यु–१६ राष्ट्रिय क्रिकेट प्रतियोगिता मे उपाधिके लाग बागमती ओ कोसी भिरना

पहुरा समाचारदाता
धनगढी, १६ बैशाख । कैलालीके धनगढीमे जारी एनआईबीएम सुदुरपश्चिम मुख्यमन्त्री १६ बर्ष टरेक राष्ट्रिय क्रिकेट प्रतियोगिताके उपाधिके लाग बागमती ओ कोसी प्रदेश प्रतिस्पर्धा कैना हुइना बा ।

शनिच्च्र हुइल सेमीफाईनलमे जित हात परटी दुनु टोली उपाधिके लाग भिरना हुइल बटै । बागमतीसे लुम्बीनी प्रदेश ओ कोसीसे मधेश प्रदेशहे हरैटी फाईनलके यात्रा तय करल हुइट । पहिल सेमीफाईनलमे कोसीसे मधेश प्रदेशहे ५८ रनसे हराइल । कोसीसे पहिल ब्याटिङ करटी निर्धारित ३० ओभरमे ८ विकेट क्षतिमे १५४ रन बनाइल । कोसीके लाग भुपाल दंगालसे ३६ रन, शिवांस बजगाईसे ३४ रन, अलिस मण्डलसे २९ रन ओ आशिक मगरसे अविजित २४ रन बनैलै । मधेशके लाग अभिषेक तिवारीसे ३ विकेट लेलै । चन्दन रामसे २ विकेट ओ रोहन शाहसे एक विकेट लेलै ।

प्रतिउत्तरमे मधेश प्रदेशसे २४ दशमलव ५ ओभरमे सक्कु विकेट क्षतिमे ९६ रन केल बनाई सेकल । ओकर लाग निरज यादवसे २८ रन, चन्दन यादवसे २३ रन, अलि अंसारीसे २० रन बनाइल । और खेलाडीसे दोहोरो रन अंक छुए नइसेकल अवस्थामे ४ जाने खेलाडी शुन्यमे आउट हुइलै । कोसीके लाग कृतिक कामतसे ५ विकेट लेलै । आशिक मगरसे २ विकेट लेहेबेर सौजन घिमिरे ओ प्रतिक पौडेलसे एक एक विकेट लेलै ।

दुसरा सेमीफाईनल खेलमे बागमतिसे लुम्बीनी प्रदेशहे ७० रनसे हराइल । पहिल ब्याटिङ करल बागमतिसे निर्धारित ३० ओभरमे ८ विकेट क्षतिमे १७५ रन बनाइल । बागमतिके लाग रोशन विकसे ४६ रन, निश्चल श्रेष्ठसे २३ रन ओ अर्थव पौडेलसे २० रन बनैलै । लुम्बीनीके लाग कमरान अहमद ओ सन्तोष यादवसे दुई दुई विकेट लेलै ।

प्रतिउत्तरमे लुम्बनी प्रदेशसे २८ दशमलव १ ओभरमे सक्कु विकेट क्षतिमे १०५ रन केल बनाई सेकल । ओकर लाग प्रतिक भट्टराइसे ४७ रन ओ सुदीप यादवसे ११ रन बनैलै । और खेलाडीसे दोहोरो रन अंक छुए नइसेक्लै । बागमतिके लाग विशाल खत्री ३ विकेट ओ रोशन विक २ विकेट लेलै ।

प्रतियोगिताके फाईनल खेल आज धनगढी स्थित फाप्ला क्रिकेट मैदानमे हुइना बा । प्रतियोगिताके विजेता नगद दुई लाख ओ उपविजेता नगद एक लाख प्राप्त करही । ओस्टेक म्यान अफ द सिरिजसे नगद १५ हजार, उत्कृष्ट ब्याट्सम्यान ओ बलरसे जनही नगद १० हजार तथा प्लेयर अफ द म्याचसे नगद दुई हजार प्राप्त करही ।

नेपाल क्रिकेट संघसे मलेसियामे हुइना १६ वर्ष टरेक ईस्ट जोन कप क्रिकेट प्रतियोगिताहे मध्यनजर करटी प्रतियोगिताके आयोजना करल हो । एसियन क्रिकेट काउन्सिलके कार्यक्रम अनुसार उ प्रतियोगिता अइना जेठ ३ से १४ गतेसम मलेसियामे हुइना बा ।