कैलारीके के गाउँमे अट्वारी ओ तीजके अवसरमे ‘फुटबल प्रतियोगिता हुइना
पहुरा समाचारदाता
धनगढी, ३० सावन । कैलालीके कैलारी गाउँपालिका ४ के गाउँस्थित खेलमैदानमे २७ औं निसर्ग फुटबल पुरुष तथा महिला प्रतियोगिता २०८३ हुइना बा ।
न्यु युवा सुन्दर शक्ति क्लवके आयोजनामे थारु समुदायके मौलिक पर्व अट्वारी ओ हिन्दु नारीहुकनके महान पर्व तीजके अवसरमे प्रतियोगिता हुइना हुइल हो ।
आयोजक क्लवसे शनिच्चरके रोज पत्रकार सम्मेलन करटी प्रतियोगिताबारे जानकारी कराइल हो । क्लवके अध्यक्ष बृक्षलाल चौधरीके अनुसार भदौ २० गतेसे ३१ गतेसम सञ्चालन हुइना प्रतियोगितामे १६ ठो पुरुष टीम ओ ८ ठो महिला टीमके सहभागिता रना जनैलै ।
प्रतियोगिताके विजेताहे पुरुषओर नगद एक लाख प्रदान कैना बा कलेसे उपविजेताहे ५० हजार प्रदान कैना आयोजक क्लव जनैले बा । ओस्टेक करके महिलाओरके विजेताहे ४० हजार ओ उपविजेता टीमहे २५ हजार प्रदान कैना क्लवके अध्यक्ष बृक्षलाल बटैलै ।
प्रतियोगितामे इन्ट्री शुल्क पुरुष टीमहे ६ हजार ५ सय ५ रुप्या ओ महिला टीमहे ३ हजार ५ सय कायम करल बा ।
यिहे बीच कैलारी गाउँपालिका ४ के वडाध्यक्ष ठागुराम चौधरी खेलकुदमार्फत व्यक्तिसे अपन व्यक्तित्व विकास करेसेक्ना बटैलै । खेलकुदमार्फत अपनहे चिन्हैनाके साथै शरीरिक स्वास्थ्यके लाग खेलकुद महत्वपूर्ण रहल उहाँक कहाई बा ।
उहाँ कहलै, गाउँघरमे रहल यूवाहुकनमेफे ढेर बा । प्रतियोगिता हुइलपाछे यूवाहुक्रे आपन उप्पर नुकल प्रतिभा डेखैना अवसर पैठै । खेलकुडसे युवाहुक्रे आपनहे दक्ष बनाइल बा । प्रतियोगिता नैहुइठ कलेसे कुशल खेलाडी राष्ट्रिय स्तरमे जैना असम्भव रहठ ।
कार्यक्रममे कैलारी गाउँपालिकाके कार्यपालिका सदस्य लालबहादुर बिक यी प्रतियोगिता कैलारीके शान रहल कहटी यिहीहे व्यापक बनाइक लाग प्रचार प्रसार आवश्यक रहल बटैलै । यूवा पुस्ताहुक्रे कुलटमे फस्टी गैल ओरसे यी खेल आयोजनासे यूवाहुकनहे यहारे व्यस्त बनाई सेक्ना बटैलै । प्रतियोगिताहे भव्य रुपमे सफल बनाइक लाग सक्कु जानेक सहकार्य समन्वय आवश्यक रहलफे उहाँ बटैलै ।
कार्यक्रममे क्लवके खेलकुद संयोजक देवनारायण चौधरी प्रतियोगिता हुइना कहटी आज सार्वजनिक कैसेकल ओरसे इच्छुक टिम समयमे टिम दर्ता कैना खेलहे मर्यादित बनैना आग्रह करलै । प्रतियोगिता संगे मेला कार्यक्रमके आयोजना हुइना, मेलामे थारु परिकारके व्यवस्था रनाफे उहाँ बटैलै । प्रतियोगिताके लाग टिम दर्ता भदौ १० गतेसम, टाइसिट निकर्ना भदौ १२ ओ खेल संचालन भदौ २० गतेसे हुइना आयोजक जनैले बा ।
