खेलकुदहे प्रोत्साहन कैना तत्पर बाटीः गापा उपाध्यक्ष
पहुरा समाचारदाता
हसुलिया, २४ भदौ । कैलारी गाउँपालिकाके उपाध्यक्ष भगवतीकुमारी चौधरी खेलकुद क्षेत्रमे प्रोत्साहन कैना स्थानीय सरकार तत्पर रहल बटैले बटी ।
न्यू यूवा सुन्दर शक्ति क्लव कैलारी गाउँपालिका वडा नम्बर ४ के गाउँमे ‘थारु समुदायके विशेष पर्व अँटवारी ओ महिलाहुकनके महान पर्व हरितालिका तिज’के उपलक्ष्यमे अँटवारसे सुरु हुइल २४आंै महिला तथा पुरुष फुटवल प्रतियोगिताके उदघाटन कार्यक्रममे उहाँ उ बाट बत्वाइल हुइट ।
खेलकुद क्षेत्रहे अब्बे प्रोत्साहन कैना स्थानीय सरकार तत्पर बा, उहाँ कहली, ‘देशमे यूवाहुक्रे लागु औषध दुव्र्यशनी फस्टी बटै, अपन संस्कार विस्रैटी बटै । टमान यूवा काम नइपाके जेहोर टेहोर खाली घुम्टी रहठै । जिहीसे अपराधिक गतिविधिसँगे आत्महत्याफे बह्रल बा ।’
उहाँ कहली, ‘भविष्यके कर्णधार भैया बहिनीयाहुकनहे जागरुक, प्रोत्साहन कैना जरुरी बा । ओइनहे मजा काममे व्यस्त बनैलेसे स्वास्थ्यके लाग मजा हो, विकासके लाग मजा हो ।’ खेलकुदमार्फत राष्ट्रहे राष्ट्रिय ओ अन्तर्राष्ट्रियस्तरमे चिन्हैना काम हुइल उहाँ बटैली । गाउँघरमे नुकल प्रतिभाहे बाहेर नानेक लाग टमान मेरिक खेलकुद प्रतियोगिता जरुरी रहल गाउँपालिका उपाध्यक्ष बटैली ।
खेलकुद क्षेत्रमे खेलाडीहुकनके उत्कृष्ट बनैना हमार सोच हो,’ उहाँ कहली, ‘जेकर लाग पाालिकासे यी बरस खेलकुद विकासके लाग ३२ लाख रुप्या विनियोजन कैगिल बा । वडा नम्बर ४ स्थित ‘के गाउँ खेलमैदानहे व्यवस्थित बनैना कार्यपालिकाके बैठकसे छलफल कैगिल बा ।’
के गाउँमे निरन्तर २४ बरससे खेलकुद प्रतियोगिता हुइटी आइल ओरसे खेलमैदानमे अइना जइना सहजुल होए कहटी हुलाकी सडकसे खेलमैदानसमके सडकहे रामसमझ मार्ग नामाकरण कैगिल ओ यिहे बरस यी डगरा निर्माण हुइना उहाँ जनैली । उहाँ खेलमैदानके दक्षिण ओर मिनिपार्क बनैना डिपिआरके तयारी करल मने रुखुवा रहल कारण कुछ समस्या आइल बटैली । कार्यक्रमके वडका पहुना रहल गाउँपालिका उपाध्यक्षसे खेलकुद प्रतियोगिता सदभाव पूर्वक सम्पन्न होए कहटी शुभकामनाफे व्यक्त करली ।
कैलारी गाउँपालिका वडा नम्बर ४ वडा अध्यक्ष ठागुराम चौधरी कैलारीमे हुइना यी प्रतियोगिता पालिकाहे खेलकुद क्षेत्रके रुपमे चिन्हाइल बटैलै । विगत २४ बरससे निरन्तर हुइटी आइल खेलमे जिल्ला भरिक क्लवके खेलाडी सहभागिता हुइटी आइल बटैलै । उहाँ प्रतियोगिताहे निरन्तरता डेहक लाग पालिका ओ वडा कार्यालयके निरन्तर सहयोग रना प्रतिवद्धताफे जनैलै ।
कार्यक्रममे प्रतियोगिताके मुख्य प्रयोजक रहल निसर्ग अस्पतालके अध्यक्ष तिर्थ पन्त, भल्मन्सा टेकबहादुर नेपालीलगागत मन्तव्य व्यक्त करल रहिट । प्रतियोगिताके उदघाटन कार्यक्रममे कैलाली जिल्ला फुटवल संघके जिल्ला सदस्य मनिराम बखरिया, सुप ११ के संयोजक सुरेश हमाल, कैलारी गाउँपालिका ४ के वडा सदस्य, के गाउँके टमान टोलके भल्मन्साहुकनके सहभागिता रहे ।
न्यू यूवा सुन्दर शक्ति क्लवके अध्यक्ष वृक्षलाल चौधरीके अध्यक्षतामे प्रतियोगिताके उदघाटन कार्यक्रम हुइल रहे । प्रतियोगितामे पुरुषओर २५ ओ महिलाओर ७ ठो टिम दर्ता हुइल बा । खेलकुदमे पुरुष प्रतियोगिताके विजेता १ लाख १०५ रुप्या, उपविजेता ५० हजार १०५ रुप्या नगद पुरस्कार ओ महिला फुटवल प्रतियोगिताके विजेता टिम २५ हजार, उपविजेता १५ हजार नगद पुरस्कार पैना क्लवके अध्यक्ष बटैलै ।
ओस्टेक करके उदघाटन खेलमे चर्च युथ ग्रुप (ए) कैलारी ओ वर पिपल थारु यूवा क्लव हरिनगर विच हुइल खेलमे चर्च युथसे २ गोल मारल कलेसे वर पिपल थारु यूवा क्लवसे तीन गोल मारल रहे ।
