इन्टरनेशनल लिग क्रिकेटके उपाधि एसपीएहे
पहुरा समाचारदाता
धनगढी, २२ कुवाँर । महेन्द्रनगरमे अँटवार सम्पन्न इन्टरनेशनल टी–२० कप क्रिकेटके उपाधि धनगढीके एसपीए कलेज जिटले बा ।
अँटवार हुइल फाइनलमे महेन्द्रनगरके लिटिलबुद्ध एकेडेमीहे ३ विकेटसे पराजित करटी एसपीएसे उपाधि उचालल हो । उपाधिसंगे १ लाख नगद हात पारल ।
एसपीएसे अपराजित रहटी प्रतियोगिताके उपाधि हात पारल हो । महेन्द्रनगरस्थित क्रिकेट मैदानमे अँटवार सम्पन्न फाइनलमे एसपीएसे पाइल ६४ रनके लक्ष्य १३.४ ओभरमे ७ विकेट गुमाके भेटाइल रहे ।
एसपीएके आशिष लुहार ६ बलमे १४ रन, विशाल विष्टसे ८ ओ गौरव मल्ल ११ रन जोरलै । लिटिलबुद्धके नरेन्द्र ऐडी ३ विकेट, राजेश ऐर २ विकेट लेलै ।
उ आघे टस जिटके ब्याटिङ करल लिटिलबुद्धके लाग पुकार चन्द २३ ओ राजेश ऐर १० रन जोरलै । एसपीएके सागर साउद ४, सौर्य श्रेष्ठ ओ खगेन्द्र कुँवर समान ३–३ विकेट लेलै । एसपीए कलेजसे यी क्षेत्रमे स्कुल तथा कलेज क्रिकेट कपमे अधिपत्य जनैटी आइल बा । कलेजमे ८ जाने अन्तर्राष्ट्रिय खेलाडी छात्रवृत्तिमे अध्ययनरत बटै ।
