नेपाल टी–२० विश्वकपमे छनोट
काठमाडौं, १७ कात्तिक । नेपाल १० बरस पाछे टी–२० विश्वकप क्रिकेटमे छनोट हुइल बा । शुकके काठमाडौंके मूलपानी मैदानमे संयुक्त अरब इमिरेट्स (युएई) हे ८ विकेटसे हरैटी नेपाल सन् २०२४ के जुनमे अमेरिका ओ वेष्ट इन्डिजमे हुइना टी–२० विश्वकपमे छनोट हुइल हो ।
इहीसे आघे नेपाल सन् २०१४ मे बंगलादेशमे हुइल टी–२० विश्वकप खेलल् रहे । मूलपानी मैदानमे युएईसे डेहल १३५ रनके लक्ष्य पछ्याइना क्रममे नेपालके आशिफ शेख सर्वाधिक ६३ रन बनाइल रहिट । ओस्टके कप्तान रोहित पौडेल ३५, गुल्सन झा २२, कुशल भुर्तेल ११ रन जोरल रहिट ।
पहिले ब्याटिङ करल युएईहे मध्यम स्कोरमे रोक्न नेपालके कुशल मल्ल महत्वपूर्ण ३ विकेट लेहल रहिट । ३ ओभर बलिङ करल उहाँ ११ रन खर्च कैके ३ विकेट लेहल रहिट । ओस्टके सन्दीप लामिछाने २, सोमपाल कामी ओ रोहित पौडेल १÷१ विकेट लेहल रहिट । काठमाडौंमे हुइल छनोट खेलसे ओमान फेन विश्वकपमे छनोट हुइल बा ।
नेपाल ओ ओमान छनोट हुइलपाछे सन् २०२४ मे हुइना टी–२० विश्वकप खेल्ना १८ टोली छनोट होसेकल बाटै । आईसीसी मेन्स टी–२० विश्वकप २०२४ मे कुल २० टीम प्रतिस्पर्धा कैना बाटै ।
जेम्ने वेष्ट इन्डिज ओ अमेरिका आयोजकके रुपमे रहल बावै ओ सीधे छनोट होसेकल बावै । २०२२ के टी–२० विश्वकपमे शीर्ष आठमे रहल अष्ट्रेलिया, इंग्ल्याण्ड, भारत, नेदरल्याण्ड्स, न्युजिल्याण्ड, पाकिस्तान, दक्षिण अफ्रिका ओ श्रीलंका सीधे छनोट होसेकल बाटै ।
टी–२० विश्वकपपाछे वरियतामे उप्पर रहल आधारमे बंगलादेश ओ अफगानिस्तान फेन स्थान सुरक्षित करले बावै । आयरल्याण्ड, स्कटल्याण्ड, पपुवा न्युगिनी ओ क्यानडा टी–२० विश्वकप रिजनल क्वालिफायर्ससे टी–२० विश्वकपमे स्थान पक्का करसेकल बावै ।
आगामी २० नोभेम्बर से १ डिसेम्बरमे नामिबियामा हुइना अफ्रिका क्वालिफायर फाइनलसे दुई टीम विश्वकपमा स्थान बनैना बाटै ।
