मानव अधिकार समूहसे ध्यानाकर्षणपत्र बुझागिल
पहुरा समाचारदाता
धनगढी, २३ कार्तिक । शिक्षा, स्वाथ्य, वातावरण ओ लैङिक हिंसा सम्बन्धी समस्याहे समाधान कैना माग करटी कैलारी गाउँपालिकास्तरीय मानव अधिकार समूहसे ज्ञापनपत्र बुझैले बा ।
मानव अधिकार समूहके अध्यक्ष मानबहादुर चौधरी, सचिव ज्ञानु चौधरीलगायतके टोलीसे प्रमुख प्रशासकीय अधिकृत विरबहादुर ऐरहे ध्यानाकर्षणपत्र बुझाइल हुइट ।
स्थानीय सरकार सञ्चलन ऐन तथा पाँचौ राष्ट्रिय कार्ययोजना अनुरुप जनताके आधारभूत आवश्यकता परिपुर्ति कैना दायित्व स्थानीय सरकारकेफे रहल ओरसे पाँचौ राष्ट्रिय कार्ययोजना कार्यान्वयन कैना उद्देश्यसे प्रमुख प्रशासकीय अधिकृत ऐरहे ध्यानाकर्षणपत्र बुझाइल हुइट हो ।
अनिवार्य, निःशुल्क, सुरक्षित ओ गुणस्तरीय प्राविधिक शिक्षा लागु करे पर्र्ना, नेपाल सरकारसे उपलब्ध करैना सक्कु मेरिक औषधि निःशुल्क वितरण करे पर्ना, वातावरण संरक्षणमे गाउँपालिकासे नीति बनाके कार्यान्वयन करे पर्नां ओ समाजमे व्याप्त जातीय विभेद, लैङि हिंसा जस्ता समस्याहे नीति तथा कानुन बनाके समाधान करे पर्ना ध्यानाकर्षण—पत्रमे उल्लेख करल बा ।
कैलारी गाउँपालिकाके प्रमुख प्रशासकीय अधिकृत बिरबहादुर ऐरसे मानव अधिकार समूहसे विगतके वर्षसे मानव अधिकारके क्षेत्रमे काम करटी आइल ओरसे मानव अधिकार समूूहहे धन्यवाद डेटी जनताके समस्या समाधान कैना अपने प्रतिवद्ध रहल बटैलै ।
