थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०३ फागुन २६४८, शनिच्चर ]
[ वि.सं ३ फाल्गुन २०८१, शनिबार ]
[ 15 Feb 2025, Saturday ]

कैलारी अध्यक्ष रनिङ कप

पहुरा | २९ माघ २०८०, सोमबार
कैलारी अध्यक्ष रनिङ कप

पुुरुष फुटवलके उपाधि वडा–६ ओ महिला फुटवलके उपाधि वडा–८ हे

पहुरा समाचारदाता
हसुलिया,२९ माघ ।
यिहे गैल माघ २० से सुरु हुइल कैलारी गाउँपालिका स्तरीय अध्यक्ष रनिङ कप खेलकुद कार्यक्रम सम्पन्न हुइल बा । अँटवारके रोज सम्पन्न हुइल प्रतियोगितामे पुरुष फुटवल प्रतियोगिताके उपाधि कैलारी गाउँपालिका वडा नम्वर ६ टोली हासिल करले बा ।

फाइनल खेल वडा नम्बर ६ ओ वडा नम्बर ७ विच प्रतिस्पर्धा हुईबेर वडा नम्बर ६ के टीम शुन्यके विरुद्ध ४ गोल मारके विजयी हुइल बा । विजयी टिम ५५ हजार नगद ओ प्रमाणपत्र, ट्रफी हासिल करले बा । ओस्टेक दुसर हुइल वडा नम्बर ७ टिम २५ हजार पैले बा ।

प्रतियोगिताके महिला फुटवल खेलमे वडा नम्बर ८ विजयी हुके ५५ हजार नगद ओ प्रमाणपत्र, ट्रफी हासिल करले बा । कलेसे दुसरा वडा–४ हुइल बा । दुसरा महिला टिम २५ हजार नगद ओ प्रमाणपत्र, ट्रफी हासिल करले बा । उ प्रतियोगिताके पुरुष भलिवलके उपाधि वडा नम्बर ७ हासिल करके नगद ३० हजार, प्रमाणपत्र ओ ट्रफी प्राप्त करले बा । उपविजेता वडा नम्बर २ बनल बा । यि टिम १५ हजार नगद, प्रमाणपत्र, ट्रफी हासिल करले बा ।

पुरुष ब्याडमिन्टन ओर वडा नम्बर १ के विजेता प्रदीप चौधरी ओ भगवान चौधरी रहल बटै । विजेताके राशी १० हजार नगदसहित प्रमाणपत्र ओ ट्रफी रहल बा । कलेसे उपविजेता बनल वडा नम्बर ७ के दया चौधरी ओ संजिव चौधरी ५ हजार नगदसहित प्रमाणपत्र, ट्रफी पैले बटै ।

ओस्टेक करके पुरुष क्रिकेट प्रतियोगितामे वडा नम्बर २ के टिम विजयी हुइल बा । यी टिम २० हजार नगद रुप्यासहित प्रमाणपत्र, ट्रफी हासिल करले बा । कलेसे उपविजेता वडा नम्बर ५ बनल बा । उपविजेताहे १० हजार नगदसहित प्रमाणपत्र ओ ट्रफी प्रदान करल बा ।

प्रतियोगिता समापन कार्यक्रम कैलारी गाउँपालिका अध्यक्ष राजसमझ चौधरीके वरका पहुनामे हुइल रहे । कार्यक्रममे उहाँ खेलाडीहुक्रे आब खेलसंँगे सामाजिक विकासओर लग्ना जरुरी रहल बटैलै । उहाँ खेलाडीहुकनके प्रोत्साहनके लाग सदैव सहयोग कैना प्रतिवद्धताफे जनैलै ।

कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी स्वास्थ्यके लाग खेलकुद अनिवार्य रहल बटैली । उहाँ कहली, खेलाडी अनुशासित रहठै, कौनोफे विकास ओ कामके लाग अनुशासन चाहठ जे ओकर पालन करठ उ सफल हुइठ ।

कार्यक्रममे कैलारी गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम खेलाडीहुकनके सम्मानके लाग गाउँपालिका सदैव सहयोग कैना तयार रहल बटैलै । कैलारी गाउँपालिकासे गैल खेल टीम टमान प्रतियोगिता जिटके नाउँ रोशन करल बटैलै ।

आयोजक कैलारी युथस यूनाइटेड क्लवके अध्यक्ष बनसराम चौधरीके अध्यक्षतामे हुइल कार्यक्रममे स्वागत मन्तव्य सचिव आशिक चौधरी ओ संचालन मञ्जु चौधरी करल रहिट । कार्यक्रममे वडा नम्बर १ के वडा अध्यक्ष धोजहरिपाल बोहरा, वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेमबहादुर चौधरी, वडा नम्बर ८ के वडा अध्यक्ष तारामल कठरिया, कार्यपालिका सदस्य, वडा सदस्य, नेपाली काँग्रेस कैलारी गाउँपालिका सभापति कृष्ण प्रसाद चौधरी, नेपाल तरुण दल केन्द्रीय सदस्य अविनाश चौधरी, थारु कल्याणकारिणी सभा कैलारी सभापति अशोक चौधरीलगायतके सहभागिता रहल रहे ।

जनाअवजको टिप्पणीहरू