१३५औं अन्तर्राष्ट्रिय श्रमिक दिवसके अवसरमे रक्तदान कार्यक्रम

पहुरा समाचारदाता
हसुलिया, १९ बैशाख । १३५औं अन्तर्राष्ट्रिय श्रमिक दिवसके अवसरमे बुधके रोज हसुलियामे वृहत रक्तदान कार्यक्रम हुइल बा । वृहत रक्तदान कार्यक्रममे ३५ पिन्ट रगत संकलन हुइल बा ।

कैलारी गाउँपालिकाके उपाध्यक्ष भगवतीकुुमारी चौधरीके बरका पहुनामे हुइल कार्यक्रममे उहाँ अपनही रक्तदान करके कार्यक्रमके उदघाटन करल रहिट । कार्यक्रममे उहाँ रक्तदान जीवनदान रहल कहटी एक फेरके रगत दान करलेसे कोई नयाँ जीवन पाई सेक्ना कहटी यी कार्यmम महत्व रहल बटैली । कार्यक्रममे विशिष्ट पहुना नेपाल तरुण दलके केन्द्रीय सदस्य अविनाश चौधरी रहल रहिट ।

कैलारी गाउँपालिकाके सहयोग तथा नेपाल रेडक्रस सोसाईटी, उपशाखा, कैलारी गाउँपालिका, नेपाल तरूण दल कैलारी, कैलारी यूथस् यूनाईटेड क्लव हसुलिया ओ किरण नेपालके संयुक्त अयोजनामे वृहत् रक्तदान कार्यक्रम हुइल रहे । कार्यक्रममे नेपाल रेडक्रस सोसाईटी, उपशाखा, कैलारी गाउँपालिकाके सभापति श्रीराम चौधरी, नेपाल तरूण दल कैलारीके अध्यक्ष केदारनाथ चौधरी, किरण नेपालके अध्यक्ष अमृतचन्द्र चौधरी, कैलारी यूथस् यूनाईटेड क्लव हसुलियाके अध्यक्ष बनसराम चौधरीलगायत समाजसेवी, बृद्धिजिवीहुकनके उपस्थिति रहे ।