कैलारीमे बालबालिका लक्षित बजेट तथा कार्यक्रमबारे छलफल

पहुरा समाचारदाता
धनगढी, २७ भदौ । कैलाली जिल्लाके कैलारी गाउँपालिकामे बालबालिका लक्षित बजेट तथा कार्यक्रमबारे छलफल कैगिल बा ।

बाल कल्याण संघ टीकापुरके आयोजनामे हुइल कार्यक्रम गाउँपालिका उपाध्यक्ष भगवतीकुमारी चौधरीके अध्यक्षतामे हुइल रहे । कैलारीहे बालमैत्री स्थानीय तह कैसिक बनाई सेक्ना कना उद्देश्य लेके बालबालिका लक्षित बजेट तथा कार्यक्रमबारे छलफल कैगिल हो । कार्यक्रममे गाउँपालिका उपाध्यक्ष भगवतीकुमारी चौधरी बालमैत्री स्थानीय तह बनैना ढेर सुचक पार करेपर्ना कहटी उ सुचक पार करेक लाग एकल प्रयाससे पुरा नैहुइना बटैली । उहाँ कहली, गाउँपालिका, संघसंस्था, अभिभावकहुकनसे बालबालिकाके क्षेत्रमे ढेर बजेट लगानी करजाइठ । प्रतिफल सोचल नैआइठ, टबमारे बालमैत्री स्थानीय शासन बनैना बहुट सहजुल टे नैहो मने सक्कु जाने लग्लेसे कर्राफे नैहो ।

गाउँपालिकाके प्रमुख प्रशासकीय अधिकृत दलबहादुर धामी हरेक व्यक्ति आपन बच्चा सुघ्रे कना सोच रहल मने उहीसे आघे अपने सुध्रना जरुरी रहल बटैलै । उहाँ कहलै, अब्बे असिन समय आगिल कोई कुहीहे नैटेरठ । अब्बे मनै आपन आफन्तहेफे चिन्हे छोरल बटै ।

बालबालिकाहुक्रे बाल विवाह कैना, लागुऔषधके दुव्र्यशनीमे लग्ना कना अभिभावक जिम्मेवार ओ वास्ता नैकरलपाछे हुइना बटैलै । उहाँ कहलै, सभ्य घर परिवारके बालबालिका ओसिन कबु करे नैसेक्ना कहटी बालबालिकाहुकनहे सुधार करेक लाग अपनही सुध्रे पर्ना जरुरी बा । गाउँपालिकासे एकचोटे बालमैत्री स्थानीय तह घोषणा करे नैसेक्ना मने ४, ५ ओ ८ नम्बर पोषणमैत्री घोषणाके तयारीमे रहल ओरसे उहीसेफे ढेर सुधार हुइना बटैलै ।

वडा नम्बर ८ के वडा अध्यक्ष तारामल कठरिया बालविवाह ओ लागु औधषके समस्या बह्रटी रहल कहटी बालमैत्री वडा घोषणाम समस्या हुइल बटैलै ।

कैलारी गाउँपालिकाके स्वास्य शाखा प्रमुख नरेशकुमार चौधरी बालबालिका तथा किशोर किशोरीके क्षेत्रमे प्रयाप्त बजेट विनियोजन करटी आइल बटैलै । यहाँ बालविवाह बह्रल कहटी आर्थिक बर्ष २०८२÷८३ मे केल्ह २० बर्ष टरेक ८८ जाने बच्चा जन्मैले बटै जेम्ने वडा नम्बर ८ केल्ह ११ जाने रहल बटैलै ।

महिला बालबालिका तथा जेष्ठ नागरिक शाखा प्रमुख बालकुमारी चौधरी बालबालिकाके क्षेत्रमे आर्थिक बर्ष २०८०÷८१ मे १० लाख ५० हजार, २०८१÷८२ सालमे ४ लाख ८५ हजार, २०८२÷८३ सालमे ६ लाख ७५ हजार ओ यिहे आर्थिक बर्षमे १६ लाख बजेट बालबालिकाके क्षेत्रमे रहल बटैली ।

पञ्जीकरण शाखाके प्रमुख दयाराम चौधरी एक बर्षमे ९ सय ७३ जाने बच्चाके जन्म हुइल बटैलै । उहाँ दलित बालबालिकाहुकनहे गाउँपालिकासे भत्ता उपलब्ध करैटी आइल बटैलै । कार्यक्रममे सञ्चारकर्मी एकिन्द्र तिमिल्सेना सहजकर्ताके भुमिका निर्वाह करल रहिट । कार्यक्रममे बालकल्याण संघके हरि प्रसाद जोशी बालबालिकाके क्षेत्रमे वल्र्डभिजन इन्टरनेशनल नेपालसे सहकार्यमे काम करटी आइल बटैलै ।

कार्यक्रममे स्वागत तथा उद्देश्यबार बालकल्याण संघके सहजकर्ता प्रेम चौधरी करल रहिट । कार्यक्रममे वडाहुक्रे, टमान विषयगत शाखाके प्रमुख, सुरक्षा निकायके प्रमुखहुकनके सहभागिता रहे ।