धनगढी उपमहानगरपलिकासे बाढ ओ डुबानसे बच्न जैविक तटबन्धन
पहुुरा समाचारदाता
धनगढी, २५ भदौ । कैलालीके धनगढी उपमहानगरपालिकासे बाढ ओ डुबानसे बच्न खुटिया लडियामे जैविक तटबन्धन सुरु करले बा ।
खुटिया लडियामे वर्षेनी अइना बाढसे धनगढीलगायत क्षेत्र डुवान ओ कटानसे प्रभावित हुइना हुइलपाछे उपमहानगरसे जैविक तटबन्धनके कामके सुरुवात करल हो ।
बाढसे वर्षेनी हुइना डुबान ओ कटानहे मध्ये नजर करटी मंगरसे वडा नम्बर ७, १२, १५ ओ १७ हुके बहना खुटिया लडियाके किनारमे चाप जातके बाँस, अम्रिसो, नेपियर बोट लगाके जैविक तटबन्धन सुरु करल धनगढी उपमहानगरपालिकाके नगरप्रमुख गोपाल हमाल बटैलै ।
चालु आर्थिक वर्षमे उपमहानगरपालिकासे लडियाके किनार ३० किलोमिटर क्षेत्रमे ६ हजार बाँस, ६ हजार ६ सय अम्रिसो ओ ६ हजार ६ सय नेपियरके टेलुवा लगाके जैविक तटबन्धन कैना नगरप्रमुख हमाल जानकारी डेलै ।
जैविक तटबन्धनसे भूक्षय रोक्नाके साथे पर्यावरणमे स्वच्छता अइना धनगढी उपमहानगरपालिका जनैले बा ।
उपमहानगरपालिकाके अनुसार बाँसके बोट बह्रलपाछे स्थानीय समुदायहे बाँससे उत्पादन हुइना वस्तु निर्माणके सीप डेके बजारीकरण कैजाई । उहीसे स्थानीयबासीके आर्यआर्जनमे वृद्धि हुके ग्रामीण क्षेत्रके अर्थतन्त्रमे टेवा पुगी ।
उपमहानगरके वातावरण अधिकृत अशोक अवस्थी उ तटबन्धन धनगढी उपमहानगरपालिका ओ जीआईजेडके ग्रेप परियोजनाके सँयुक्त साझेदारीमे १७ लाखके लागतमे करे लागल बटैलै ।
उहाँ कहलै, ‘जैविक तटबन्धनके लाग बोट लगैना काम सुरु हुसेकल बा । कुछ दिनमे उ कार्य सम्पन्न हुई ।’
स्थानीयसे जैविक तटबन्धन हुइलपाछे वातावरण स्वच्छता हुइनाके साथे कटानसे जोग्ना सहयोग पुग्न स्थानीय बटैले बटै । खुटिया लडियामे अइना बाढसे वर्षेनी भारी धनजनके क्षति हुइना करल बा ।
