चैतन्य कला संस्कृति उत्सव सम्पन्न

पहुरा समाचारदाता
धनगढी, १४ कुवाँर । कैलालीके धनगढी उपमहानगरपालिका वडा नम्बर ५ शिवनगरमे रहल चैतन्य पाठशालाके आयोजनामे सोम्मारके रोज चैतन्य कला संस्कृति उत्सव २०८१ निम्जल बा ।

विजय दशमी, दिपावली तथा छठ पर्वके अवसर पारके हुइल चैतन्य कला संस्कृति उत्सव कार्यक्रममे सुदूरपश्चिम प्रदेश कला सस्कृति झल्कना टमान मेरिक सांस्कृतिक प्रस्तुती, विद्यार्थीहुकनके सांस्कृतिक प्रस्तुती, स्थानीय कलाकारहुकनके प्रस्तुती, स्थानीय÷मौलिक परिकार, देउडा प्रस्तुती, लिङगे पिङ, रमाइलो खेल रहल रहे ।

विद्यालय व्यवस्थापन समिति अध्यक्ष ईश्वर गिरीके अध्यक्षतामे हुइल कार्यक्रममे सुदूरपश्चिम प्रज्ञा प्रतिस्ठानके उपकुलपति डा. टिएन जोशी बरका पहुना रहल रहिट । कार्यक्रममे सम्बोधन करटी उहाँ हमार मौलिकता उप्पर प्रहार हुइटी रहल बेला चैतन्य पाठशालाके आयोजना कैगिल चैतन्य कला संस्कृति उत्सवसे संस्कृति संरक्षणमे टेवा पुग्ना बटैलै ।
संस्थागत विद्यालयसे यी मेरिक कार्यक्रमके सुरुवा कैना सह्रनिय हो,’ उहाँ कहलै, ‘यी विद्यालयसे छुटटे पहिचान बनैटी रचनात्मक कार्य करटी आघे बह्रल बा । आजकाल्ह बालबालिकाहे संस्कार ओ संस्कृति सिखैना जरुरी बा जौन चैतन्य पाठशाला आघे बह्रल बा ।’

उहाँ कहलै, ‘अँग्रेजी सिख्ना जरुरी ओकर संँगे हमार पहिचान का हो । कला, संस्कृति का हो उ बु्झना जरुरी बा । अब्बे संघीयता आइल बा, ओकर मर्मफे यिहे हो हमार पहिचानके सम्वृद्धि हुइना आवश्यक बा ।’

चैतन्य पाठशालाके सिईयो गणेश प्रसाद जोशी पाठशालाके यैसिन अतिरिक्त क्रियाकलापमे अभिभावक लगायत पाठशालाके शुभचिन्तकहुकनसे मिलल हौसलासे थप उर्जा मिलल ओ अइना दिनमेफे यैसिन साथ सहयोगके आशा लेहल बटैलै ।
कैलाली बहुमुखी क्याम्पससके प्राध्यापक सिताराम भट्ट हमार बालबालिका अँग्रेजी बोल्ले जन्लै ओटरेमे पुगैल कहिके खुशी बटी । मने भ्रममे नापरी शिक्षा सँगे संस्कार नैहो कलेसे पह्रलके कौनो अर्थ नैहो ।

कार्यक्रममे बोल्टी चैतन्य पाठशालाके प्राधानाध्यापक कटकबहादुर सिंह हम्रे हमार कला संस्कृतिहे जग्रेना करे पर्ना बटैलै । शिक्षा ओ संस्कारहे मुल जोड डेटी आइल चैतन्य पाठशाला हरेक वर्ष यैसिन कार्यक्रम करटी आइल उहाँ बटैलै । हमार कला संस्कृति हमार पहिचान, मौलिकतामे हमार चैतन्यके सदा साथ रहल उहाँ बटैलै । अभिभावक भरत विक्रम शाह अपने यिहे बरससे चैतन्य पाठशालामे अपन लर्का पह्रैना सुरु करल ओ ६ महिनाके अवधिमे और विद्यालयसे फरलक महशुस हुइल बटैलै । उहाँ कहलै, ‘मोर लर्का शिक्षा संँगे संस्कार सिख्ना मौका पैलै । विद्यार्थीसंगे अभिभावकहे उ मौका मिलल बा ।’

कार्यक्रममे वरिष्ठ डेउडा कलाकार नन्दराज रेग्मी, लाल बहादुर थापाके देउडा प्रस्तुती, उहे विद्यालयमे अध्ययनरत रहल विद्यार्थीनके सांस्कृति प्रस्तुती रहे । कार्यक्रममे पत्रकार महासंघके केन्द्रीय सदस्य भरत शाह, उद्योगपति ओम प्रकाश अग्रवाल, अभिभावक, पत्रकार शिक्षक, शिक्षिका विद्यार्थीनके उपस्तिथि रहे । कलेसे कार्यक्रमके सञ्चालन शिक्षिका हेमा जोशी करल रहिट ।