धनगढीमे सार्वजनिक चौतारा संरक्षण
पहुरा समाचारदाता
धनगढी, ७ कार्तिक । कैलाली धनगढीमे सार्वजनिक चौताराके संरक्षण करटी रङरोगन कैके चिटिक्क बनाजैटी बा ।
विकासके नाउँमे होए या संरक्षण नैहुके सार्वजनिक चौतारा नाश हुइटी जाइ लागलपाछे धनगढी उपमहानगरपालिका यकर संरक्षणमे जुटल हो ।
मानव जीवनके लाग चौतारा आवश्यक महसुस करके रङरोगनसहित चिटिक्क पारके संरक्षणके अभियान सुरु करल धनगढी उपमहानगरपालिका जनैले बा । उपमहानगरपालिकासे १९ वडामे रहल सार्वजनिक चौतारामे झार उखर्ना, भत्कल पाटी मर्मत कैना ओ रङरोगन कैना अभियान सञ्चालन करके पहल सुरु करलपाछे धनगढीके चौतारा फेरसे सफा ओ चिटिक्क हुके बैठना लायक हुइल बा ।
धार्मीक रुपमेफे महत्वपूर्ण मानल बरपिपलके चौतारालगायतके चौतारा विस्तारे नस्टी जाई लागलमे यहाँके बुढापाका चिन्तित रहिट । धनगढी उपमहानगरपालिकासे पछिल्का समय संरक्षण अभावमे अस्तित्व संकटमे परटी गैलमे सार्वजनिक चौताराके संरक्षण कैना अभियान सुरु करलपाछे ओइने खुसी हुइल बटै ।
नेंगेबेर थकाइ लागेबेर थकाइ मेटैना , भारी बिसैना, पुण्य प्राप्त हुइठ कना धार्मिक विश्वाससे चौतारी बनैना करके फे हाल ओहोर ओर चासो कमी हुइटी गैल कारण चौतारा संरक्षणबिहीन हुइटी गैल रहिट । धनगढी उपमहानगरपालिकासे पछिल्का समयमे चौतारा वारपरके झार सफा करके रङरोगन करके चिटिक्क पारलपाछे अपने जस्टे पाको उमेरके बृद्धहुकनहे चौतारामे बैठके सुखदुख सट्न सहजुल हुइल धनगढीके पार्कमोडके चौतारामे बैठल ७५ वर्षीय जयराज जोशी बटैलै ।
उहाँ चौतारा सक्कुहुनके साझा थलो रहल ओरसे उपमहानगरपालिकासे केल नाही सक्कु जाने आ अपन गाउँठाउँमे रहल चौताराके सरसफाई करके संरक्षण करेपर्ना बटैलै । कलेसे अपन जस्टे काम करे नैसेक्ना अवस्था रहलहुकनके सार्वजनिक चौतारामे दिन कटैना ओ सुखदुख सट्न प्रमुख थलो हो ।
धनगढी नगर प्रहरी बलसे सार्वजनिके चौतारा वरपरके झाडी फँरना, भत्कल रलेसे ओकर मर्मत कैना ओ रङरोगन करके चौतारामे सक्कु जने डेख्ना ठाउँमे आपतकालिन सेवाके लाग नगर प्रहरीके सम्पर्क नम्बर, दमकल सेवाके सम्पर्क नम्बर तथा निःशुल्क टोल फ्री नम्बर समेत लिख्न काम करटी आइल बा ।
हालसम ६० ठो चौतारामे रङरोगन तथा सरसफाई करल धनगढी नगरप्रमुख गोपाल हमालका स्वकीय सचिव सुरेन्द्रप्रसाद भट्ट बटैलै ।
नगर प्रहरी बलसे डेवारीसम नगरके सक्कु सार्वजनिक चौताराके सरसफाई ओ रङरोगन करके चिटिक्क पारके संरक्षण कैना लक्ष्य रहल धनगढी उपमहानगरपालिकाके प्रमुख प्रशासकीय अधिकृत नरेन्द्रबहादुर खाती बटैलै ।
उहाँ सफा धनगढी, सुन्दर धनगढी अभियान अन्तर्गत सार्वजनिक चौताराहे बैठना ओ हेर्न लायक बनाई लागल बटैलै ।
धनगढी नगर प्रहरी प्रमुख धर्मानन्द जोशीके अनुसार डेवारीसम १९ वडाके सक्कु चौतारामे रङरोगन कैसेक्ना करके काम हुइटी रहल बटैलै ।
‘नगर प्रहरीसे नगर क्षेत्रके सार्वजनिक चौतारा खोज्टी रङरोगन कैना ओ सर्वसाधारणसे बैठना लायक बनाई लागल हो,’ प्रमुख जोशी कहलै, ‘उपमहानगरसे सार्वजनिक चौतारा ओ ओम्ने रहल रुखुवाके समेत संरक्षण कैना करके रङरोगन कैना काम हुइटी रहल बा ।’
