कैलारी–३ मे वडा स्तरीय खेलकुद प्रतियोगिता सुरु

पहुरा समाचारदाता
हसुलिया, १७ पुस । कैलाली जिल्लाके कैलारी गाउँपालिका वडा नम्बर ३ मे वडा स्तरीय खेलकुद प्रतियोगिता सुरु हुइल बा ।
वडा स्तरीय समन्वय खेलकुद समितिके आयोजना तथा कैलारी गाउँपालिका वडा नम्बर ३ के सहयोगमे बुधके रोजसे वडा स्तरीय छनौट फूटवल, भलिवल तथा ब्याट्मिन्टन प्रतियोगिता सुरु हुइल हो ।

वडा स्तरीय समन्वय खेलकुद समितिके अध्यक्ष भीखराम चौधरीके अध्यक्षतामे हुइल प्रतियोगिताके उदघाटन खेलकुद प्रतियोगिताके वरका पहुना वडा नम्बर ३ के वडा अध्यक्ष सन्तराम चौधरी रहल रहिट । कार्यक्रमके पहुनामे कैलारी गाउँपालिका वडा नम्बर ७ वडा अध्यक्ष दिपेन्द्रबहादुर बम, वडा नम्बर ३ के वडा सदस्य सकुन्तला चौधरी, कैलाली जिल्ला फूटबल संघके सदस्य मनिराम बखरिया , नेपाली कांग्रेस कैलारी कार्य समितिके सभापति कृष्ण प्रसाद चौधरीलगायतके बुद्धिजीवी रहल रहिट ।
कार्यक्रमके सञ्चालन अमृत चौधरी ओ स्वागत मन्तव्य समन्वय समितिके उपाध्यक्ष जोगेन्द्र चौधरी करल रहिट । प्रतियोगिताके उदघाटन खेल उत्तर भडरी भरसेस निमुवाबोझी विच हुइल बा । प्रतियोगिता पुस २० गतेसम संचालन हुइना बा ।
