चैतन्य पाठशालासे राष्ट्रिय क्रिकेट खेलाडीनहे सम्मान

पहुरा समाचारदाता
धनगढी, २४ माघ । शिक्षा ओ संस्कारके संगम, वेद ओ विज्ञानके संयोजन, प्रकृति ओ संस्कृतिके सम्मान“ कना दर्शन बोकल चैतन्य पाठशालासे स्थापना कालसे सामाजिक सेवा तथा प्रतिभाहे सम्मान करटी आइल बा ।

यिहे सन्दर्भमे नेपाली क्रिकेट खेल जगतमे राष्ट्रिय तथा अन्तर्राष्ट्रिय क्षेत्रमे नेपालके नाम चिन्हैना सफल ५ जाने क्रिकेट खेलाडी कुशल भुर्तेल, लोकेश बम, ललित राजवंशी, विनोद भण्डारी ओ सन्दीप जोराहे आज एक समारोह बिच सम्मान पत्रसहित जनही रु.१० हजार प्रदान करके सम्मान करल बा ।

पाठशालाके विहानी सत्रमे करल उ समारोहमे विद्यार्थीहुक्रे माझ अपन अनुभवसंग साक्षात्कार करैटी क्रिकेटर कुशल भुर्तेलसे सफलता प्राप्तीके लाग अनुशासनके भारी महत्व ओ इच्छाशक्ति हुइलेसे जीवनमे जौनफे क्षेत्रमे सफलता हासिल करे सेक्ना बाट विद्यार्थीहुकनहे बटैले बटै । ओस्टेक क्रिकेटर लोकेश बम फे नेपाली खेलके क्षेत्रमे यी पाठशालासेफे खेलाडी जन्मही कहिके शुभकामना व्यक्त करले रहिट साथे पाठशाला परिवारप्रति खेलाडी समूहसे यी सम्मानसे अपनेहुकनहे थप हौसला मिलल कहिके धन्यवाद ज्ञापन समेत व्यक्त करले बटै ।

कार्यक्रममे बोल्टी विद्यालयके अध्यक्ष गणेश प्रसाद जोशी आजके बालबालिकाहे किताबी ज्ञान केल नैहुके रुची अनुसारके क्षेत्रमे अग्रसर करैना बाटफे बटैलै । विद्यालयके प्रधानाध्यापक कटक बहादुर सिँह धन्यवाद ज्ञापन करटी विद्यालयसे विद्यार्थीमैत्री वातावरण डेहल ओ चैतन्य स्पोट्र्स एकेडेमीसे खेल जगतमे मजा प्रतिभा उजागर कैना बटैले बटै । नेपाली क्रिकेटप्रेमीहुकनके मन जित्न सफल हुइल क्रिकेट टोलीसंग प्रत्यक्ष साक्षात्कार करे पाके विद्यार्थीहुक्रे बहुट उत्साहित हुइल रहिट ।