जयपृथ्वीबहादुर सिंह गौरीगंगा फुटवल प्रतियोगिता फागुन ७ गतेसे हुइना

पहुरा समाचारदाता
धनगढी, ४ फागुन । कैलालीमे जयपृथ्वीबहादुर सिंह गौरीगंगा राष्ट्रिय फुटबल प्रतियोगिता फागुन ७ गतेसे सञ्चालन हुइना बा ।

गौरीगंगा–११ स्पोर्टस क्लवके आयोजना ओ सुदूरपश्चिम खेलकुद परिषद्के तत्वाधानमे राष्ट्रियस्तरके फुटवल प्रतियोगिता सञ्चालन हुइना आयोजके अँटवारके रोज धनगढीमे पत्रकार सम्मेलन करटी प्रतियोगिताके बारेमे जानकारी डेहल हो ।

प्रतियोगिताके विजेता ५ लाख नगद सहित ट्रफी पैही कलेसे उपविजेता दुई लाख पचास हजार नगद सहित ट्रफी मेडल पैही । प्रतियोगिताके सर्वोत्कृष्ट खेलाडी पचास हजार, उत्कृष्ट गोलरक्षक १५ हजार, उत्कृष्टरक्षक १५ हजार, उत्कृष्ट फरवार्ड १५ हजार, सर्वाधिक गोलकर्ता १५ हजार, उदयमान खेलाडी १५ हजार, फेयर प्ले टिमहे १५ हजार पुरस्कार डेना बा ।

प्रत्येक खेलके म्यान अफ द म्याचसे नगद पाँच हजार सहित ट्रफी डेना आयोजक जनैले बा । प्रतियोगितामे ७ ठो प्रदेशके टीमके सहभागीता रना बा । प्रदेश फुटवल संघके सहकार्यमे प्रदेशके टीम अथवा प्रदेशके क्लवके सहभागीता प्रतियोगिता रना बा । प्रतियोगिता फागुन १४ गतेसम सञ्चालन हुइना बा ।

समृद्धिके आधार फुटवलके पूर्वाधार कना मूल नाराके साथ सुदूरपश्चिम प्रदेशके राष्ट्रिय विभूतिके नाममे प्रतियोगिता सञ्चालन करे लागल आयोजक गौरीगंगा–११ स्पोर्टस क्लवके अध्यक्ष दिनेश कलेल जानकारी डेलै । गौरीगंगा–११ क्लवसे आयोजना करे लागल यी प्रतियोगिता पाँचौं संस्करण हो । मने यी बार प्रदेश खेलकुद परिषदके तत्वाधानमे राष्ट्रिय विभूतिके नाममे यी प्रतियोगिता सञ्चालन करे लागल क्लवके अध्यक्ष दिनेश कलेल जानकारी डेलै । ‘कैलालीके मध्यवर्ती क्षेत्र राजमार्गमे रहल उ ठाउँमे रहल खेल मैदानहे रंगशालाके रूपमे निर्माण कैना ओ उहाँक खेल ओ खेलाडीके विकास होए कना उद्देश्यसे दबाब डेना प्रतियोगिता सञ्चालन करटी आइल बटी ।’ उहाँ कहलै ।

यी प्रतियोगिताहे मध्यवर्ती क्षेत्रमे खेलकुद क्षेत्रमे विकास पुग्न ओ फुटवल खेलाडी अपन क्षमता प्रदर्शन कैना एक ठो मञ्च प्राप्त कैना सुदूरपश्चिम खेलकुद परिषद्के सदस्य सचिव दीपकबहादुर सिंह जानकारी डेलै । गौरीगंगा नगरपालिका–८ मे रहल गौरीगंगा–११ स्पोर्टस क्लवके खेलमैदानमे प्रतियोगिताके खेल सञ्चालन हुई । प्रतियोगिताके लाग खेल मैदान व्यवस्थित कैना काम सम्पन्न हुइल बा ।