भन्सार चेकजाँच कडाई कैना
पहुरा समाचारदाता
धनगढी, ५ बैशाख । सुदूरपश्चिम प्रदेशमे भन्सार चेकजाँच, सीमापार आवागमन, पर्यटन तथा व्यापार सहजीकरण, लागुऔष नियन्त्रण ओ रोजगारीके सिलसिलामे भारत जैना नेपाली नागरिकहुकनके अभिलेख व्यवस्थापनहे प्रभावकारी बनैना निर्णय कैगिल बा ।
शुकके रोज मुख्यमन्त्री तथा मन्त्रिपरिषद्के कार्यालयमे सुदुरपश्चिम प्रदेशके मुख्यमन्त्री कमलबहादुर शाहके अध्यक्षतामे बैठल मन्त्रीपरिषद्के बैठकसे उ निर्णय करल हो ।
लागुऔषधजन्य गतिविधि नियन्त्रण सुपरिवेक्षण समितिमे प्रमुख सचिव–मुख्यमन्त्री तथा मन्त्रिपरिषद्के कार्यालयके संयोजकत्व समिति गठन कैगिल बा । जेकर सदस्यमे प्रदेश सचिव, आन्तरिक मामिला तथा कानून मन्त्रालय, प्रमुख जिल्ला अधिकारी, कैलाली ओ कञ्चनपुर, सुरक्षा निकायके प्रदेशस्तरीय प्रमुखहुक्रे, (नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान) ओ सदस्य सचिवमे प्रदेश सचिव कानून, मुख्यमन्त्री तथा मन्त्रिपरिषद्के कार्यालय रहल बा ।
सीमापार आवागमन, पर्यटन तथा व्यापार सहजीकरण समितिमे प्रमुख सचिब–मुख्यमन्त्री तथा मन्त्रिपरिषद्के कार्यालयके संयोजकत्वमे समिति गठन हुइल बा ।
जेकर सदस्यमे प्रदेश सचिव, आर्थिक मामिला मन्त्रालय, प्रदेश सचिव, भौतिक पूर्वाधार विकास मन्त्रालय, प्रमुख जिल्ला अधिकारी, कैलाली ओ कञ्चनपुर, सुरक्षा निकायके प्रदेशस्तरीय प्रमुख (नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान) ओ सदस्य सचिव प्रदेश सचिव, आन्तरिक मामिला तथा कानून रहल बा ।
यी समितिसे राजश्व अभिवृद्धी, भन्सार चेकजाँच, सीमापार आवागमन, पर्यटन सहजीकरण ओ रोजगारीके सिलसिलामे भारत जैना नेपाली नागरिकहुकनके अभिलेख व्यवस्थापन कार्यहे थप व्यवस्थित ओ प्रभावकारी बनैना कार्यविवरण ओ कार्ययोजना तयार करके उहे बमोजिम कैना निर्णय हुइल बा ।
