लोहरपुरमे भजहर कप फुटबल प्रतियोगिता हुइटी
पहुरा समाचारदाता
धनगढी, १२ बैशाख । कैलालीके कैलारी गाउँपालिका वडा नम्बर ८, लोहारपुरमे थारु साँस्कृतिक पाँचौ बर्का भजहर कप फुटबल प्रतियोगिता सञ्चालन हुइना हुइल बावै ।
युवा जनहित क्लबके अयोजनामे इहे बैशाख १७ गतेसे २४ गतेसम खेलकुद प्रतियोगिता हुइना शुकके धनगढीमे पत्रकार सम्मेलन मार्फत जानकारी डेहल बावै । थारु समुदायके लोप हुइटी गैल मौलिक टिह्वार तथा संस्कृति संरक्षण सम्बद्र्धन कैना उद्देश्यसे भजहरके अवसरमे खेलकुद प्रतियोगिता आयोजना करे लागल क्लबके उपाध्यक्ष कालुराम चौधरी बटैलै । उहाँ फुटबल प्रतियोगिता सँगे थारु समुदायके पौराणिक खेलकूद फेन आयोजना कैना बटैलै ।
उपाध्यक्ष चौधरीके अनुसार फुटबल प्रतियोगिताके साथे थारु समुदायके महिलाके लाग छुर, डेल्वा दौड, टाँरा चिरौवर, कबड्डी, कुइली दिदी तथा पुरुष डेगा दौड लगायतके प्रतियोगिता आयोजना कैना बटैलै ।
आयोजक क्लबके अनुसार फुटबल प्रतियोगिताके बिजेता एकलाख ओ उपविजेता ५० हजार रुपैयाँ पुरस्कार पैना बटै । फुटबल प्रतियोगिताके लाग १६ टिमके सहभागिता रहना जनाइल बावै ।
थारू समुदायमे रोगव्याधि लागे नैडेहक लाग भजहर पूजा कैना चलन रहल बावै । गाउँसे कुछ डुर रुख्वाके छाहीमे रमाइलो कैटी यी पूजा करजाइठ् । यी पूजामे गाउँके गुरुवा गाउँघरमे रोगव्याधि नआए, बालबच्चा सुखीखुसी रहिट्, गोरु, गैया, भैँसीनहे रोगव्याधि नलागे ओ खेतीपातीमे किराके प्रकोप नहोए कहिके पूजा कैना चलन रहल बावै ।
