थारु होमस्टे गाउँ भादा देशके उत्कृष्ट
पहुरा समाचारदाता
धनगढी, २३ वैशाख । थारु होमस्टे गाउँ भादा देशके उत्कृष्ट होमस्टेके रुपमे छनौट हुइल बावै ।
संस्कृति, पर्यटन तथा नागरिक उड्डयन मन्त्रालय अन्तरगतके तारा गाउँ विकास समितिसे एक कार्यक्रमके बीच भादा होमस्टेहे उत्कृष्ट घोषणा कैटी एक लाख धनराशीसे पुरस्कृत करल बावै । थारु होमस्टे गाउँ भादा पर्यटन विकास तथा व्यवस्थापन समिति कैलालीके अध्यक्ष लक्ष्मीनारायण चौधरीहे एक लाखके चेक सहित पुरस्कृत करल हो ।
नेपाल सरकार संस्कृति, पर्यटन तथा नागरिक उड्ययन मन्त्रालय तारा गाउँ विकास समितिसे आव ०८१/८२ के वार्षिक कार्यक्रम अन्तर्गत धनगढी उपमहानगरपालिका–१६ भादा गाउँमे रहल थारु होमस्टे गाउँ भादा पर्यटन विकास तथा व्यवस्थापन समिति कैलालीहे उत्कृष्ट होमस्टेके रुपमे घोषणा करल हो ।
ओस्टके, बर्दियाके जैविक मार्ग होमस्टे डल्ला डुसरा हुइल बावै । डल्लाहे ७५ हजार धनराशीसे पुरस्कृत करल बावै । ओस्टके, हाँडीगाउँ सामुदायिक होमस्टे काठमाण्डौ टिसरा उत्कृष्ट होमस्टे स्थान हासिल करले बावै । हाँडीगाउँ होमस्टेहे ५० हजार धनराशीसहित पुरस्कृत करले बावै ।
भादा गाउँमे आयोजित सुदूरपश्चिम प्रदेशगत होमस्टे कार्यशाला (घरवास) कार्यशालाके समापन कार्यक्रममा समितिके अध्यक्ष सुरेशराज जोशी तथा कार्यक्रमके बर्का पहुना नेपाली काँग्रेस सुदूरपश्चिम संसदीय दलके प्रमुख सचेतक विक्रम सिंह धामी उ होमस्टेहे पुरस्कृत करल रहिट ।
तारा गाउँ विकास समितिसे नेपालभरके होमस्टेहे कुछ समय आघे पुरस्कारके लाग आवेदन आह्वान करल रहे । उहे आवेदनके आधारमे भादाहे उत्कृष्ट होमस्टेके रुपमे छनोट करल होमस्टे महासंघ सुदूरपश्चिमके अध्यक्ष दिनेश दहित जानकारी डेलै ।
