जाली गाउँमे पाँचुवा माघी मेला लग्ना
पहुरा समाचारदाता
धनगढी, २५ पुस । धनगढी उपमहानगरपालिका–६ स्थित जाली गाउँमे यी वर्षफे माघी पर्वक अवसरमे भव्य माघी मेला आयोजना हुइना जनागिल बा ।
जाली गाउँ सामुदायिक वनके खेलमैदानमे यिहे पुस ३० गतेसे माघ २ गतेसम मेला सञ्चालन हुइना आयोजक जनैले बा । जाली गाउँ माघी मेला संस्थाके आयोजनामे हुई लागल यी बरस पाँचुवा संस्करण हो ।
मेला स्थानीय थारु समुदायके मौलिक संस्कृति, परम्परा व पहिचानके संरक्षण तथा प्रवद्र्धन कैना उद्देश्यसे आयोजना कैलक संस्थाके अध्यक्ष फुलाराम चौधरी जानकारी डेलै ।
मेलामे थारु समुदायके मौलिक खानपान, पहिरन, कला तथा संस्कृतिके झल्को डेना विविध कार्यक्रम प्रस्तुत कैना बा । थारु परिकारके स्टल, सांस्कृतिक नाचगान, झाँकी तथा सांगीतिक कार्यक्रम मेला आकर्षणक केन्द्र रना आयोजक जनैलै । दर्शक तथा आगन्तुकके लाग निशुल्क प्रवेशके व्यवस्था मिलाइल बा । माघ पर्वके अवसरमे थारु समुदायके जीवनशैली लग्गेसे बुझ्न तथा स्थानीय स्वाद व संस्कृतिमे रमैना सक्कु् जाहनहे मेलामे सहभागी हुई आयोजक आग्रह करले बा ।
हरेक वर्ष माघ पर्वके अवसरमे आयोजना हुइटी आइल यी मेला सामाजिक सद्भाव, आपसी सहकार्य तथा स्थानीय अर्थतन्त्रहे समेत टेवा पुगैटी आइल आयोजकके कहाई बा । हाल मेलाके तयारी तीव्र रूपमे आघे बह्राइल संयोजक चौधरी जानकारी डेलै । स्थानीय बासिन्दा केल्ह नाही, धनगढी उपमहानगरपालिका तथा आसपासके क्षेत्रके सर्वसाधारणके लागफे माघ मेला सांस्कृतिके उत्सवके रूपमे स्थापित हुइटी गैल बा ।
