संस्कृति संरक्षणसंगे पुस्तान्तरणके लाग माघ मिलन कार्यक्रम

पहुरा समाचारदाता
धनगढी, १८ माघ । कैलाली जिल्लाके कैलारी गाउँपालिका वडा वडा नम्बर ३ मे संस्कृति संरक्षणसंगे पुस्तान्तरणके लाग माघ मिलन कार्यक्रम कैगिल बा ।

वडा नम्बर ३ मे वडा कार्यालयके सहयोगमे वडा स्तरीय महिला सञ्जाल तथा अन्तर पार्टी महिला सञ्जालके सयुक्त आयोजनामे माघ मिलन कार्यक्रम सम्पन्न हुइल हो ।

वडा स्तरीय महिला सञ्जालके अध्यक्ष विन्द्रा चौधरीके अध्यक्षतामे हुइल रहे । कार्यक्रममे बरका पहुना वडा नम्बर ३ के वडा अध्यक्ष सन्तराम चौधरी ओ विशिष्ट पहुना वडा सदस्य किसुनलाल चौधरी, सैतुराम चौधरी, सकुन्तला चौधरी, पार्वती विक रहल रहिट ।

कार्यक्रममे सम्बोधन करटी बरका पहुना सन्तराम चौधरी थारु समुदायके लोप हुइटी रहल धरापमे परटी रहल कला, संस्कृति संरक्षणके लाग वडा स्तरीय महिला सञ्जाल तथा अन्तर पार्टी महिला सञ्जालसे करल कार्य मजा रहल बटैलै । कला, संस्कृति संरक्षणमे पुरुषसे ढेर महिलाहुकनके डेन रहल कहटी यी कार्यक्रमहे निरन्तरता डेना आग्रह करलै ।

वडा सदस्य किसुनलाल चौधरी कार्यक्रमके शुभकामना डेटी संस्कृति संरक्षणके लाग सक्कु जाने लग्लेसे केल्ह सम्भव रना बटैलै । वडा सदस्य पार्वती विक ओरेक जानेक संस्कृति अंगल्न ओ आपन परम्परागत संस्कृतिहे विस्रैना काम हुइटी रहल बटैली ।

वडा नम्बर ३ उत्तर भडरीके भल्मन्सा छोटेलाल चौधरी आधुनिकताके नाउमे बाहिय संस्कृतिके प्रवेश ओ हमार संस्कृति विस्थापित हुइटी रहल बटैलै । थारु समुदाय टरटिहुवार हेरैटी गैल ओ दुसरके संस्कृति मनाई सुरु हुइल उहाँ बटैलै । थारु समुदायके वंशफे लोप हुइना अवस्था अइटी रहल ओरसे सोचेपर्ना जरुरी रहल बटैलै ।

कार्यक्रममे वडा स्तरीय महिला संजालके कोषाध्यक्ष रेखा चौधरी, टिसिएनके भल्मन्सा परसुराम चौधरी, अन्तर पार्टी महिला संजालके सदस्य रत्ना महतों, महिला स्वास्थ्य स्वयं सेविका अनिता चौधरी मन्तव्य राखल रहिट । कार्यक्रममे अन्तर पार्टी महिला संजालके सदस्य तथा धनवेलिया सामुदायिक वन उपभोक्ता समुहके अध्यक्ष सीता चौधरी स्वागत मन्तव्य राखल रहिट । कार्यक्रमके संचालन लक्ष्मी चौधरी करल रही ।

कार्यक्रममे वडा नम्बर ३ स्थित ११ गाउँक टमान मेरिक सांस्कृतिक झाँकी डेखागिल बा । कलेसे सचेतनामुलक नाटकफे प्रस्तुत कैगिल बा । कार्यक्रममे वडा सचिव दयाराम चौधरी, ११ गाउँक भल्मन्सा, बृद्धिजिवी, वडाबासीहुकनके सहभागिता रहे ।