धनगढी उपमहानगरके २ हजार तीन सय किशोरीहे एचपीभी खोप लगैटी
पहुरा समाचारदाता
धनगढी, २७ माघ । कैलालीके धनगढी उपमहानगरपालिकाके २ हजार तीन सय किशोरीहे ह्युमन प्यापिलोमे भाइरस (एचपीभी) खोप लगैना बा ।
माघ २७ गतेसे फागुन ४ गतेसम ‘एचपिभी’ खोप अभियान अन्तरगत उ संख्यामे किशोरीहे पाठेघरके मुखके क्यान्सर विरुद्धके एचपीभी खोप लगैना लक्ष्य राखल बा । उपमहानगरपालिकाके स्वास्थ्य शाखाका प्रमुख योगेश अवस्थी यी वर्ष कक्षा ६ मे अध्ययन कैना बालिकाहे लक्षित करके खोप लगैना बटैलै ।
उहाँ कक्षा ६ मे पह्रना, गैल वर्ष ११ से १४ वर्ष उमेरके खोप नैपाइल, स्कुलमे नैजैना खोप नैपाइल १० से १४ वर्ष उमेरके किशोरीहे खोप लगैना बटैलै । उहाँ यी खोप एक चो केल्ह लगैना हुइल ओरसे गैल वर्ष लगाइहुकनहे लगैना आवश्यक नैहुइल बटैलै । गैल वर्ष उपमहानगरपालिकासे १० हजार १ सय ३५ किशोरी खोप लगाइल रहे । १० से १४ वर्ष उमेर समूहके कक्षा ६ से १० समके किशोरीहे खोप लगाइल रहे ।
यी वर्ष खोप लगाइक लाग १३५ ठो केन्द्र तोकल स्वास्थ्य शाखा प्रमुख अवस्थी बटैलै । मंगरके केल्ह ७०७ किशोरीहे खोप लगाइल उहाँ बटैलै । नेपालमे हरेक वर्ष २ हजार १६९ जाने महिलाहे पाठेघरके मुखके क्यान्सर हुइना अनुमान बा ।
जौन मन्से हरेक वर्ष १ हजार ३१३ जाने महिलाके मृत्यु हुइना अनुमान बा । महिलामे हुइना क्यान्सर मध्ये पाठेघरके मुखके क्यान्सर दुसरा कारण रहल हुइलेसेफे क्यान्सरसे महिलाके मृत्यु हुइना पहिल मुख्य कारण रहल बा । पाठेघरके मुखके क्यान्सर एचपीभी भाइरसके कारण हुइना ओ यकर २ सय प्रजाति हु्इलेसेफे १६ ओ १८ ढेर जोखिममे रहल स्वास्थ्यकर्मी बटैल करल बटै ।
