धनगढीमे माइक ओ डिजे बजैना रोक, अटेर करलेसे कारबाही हुइना चेतावनी
पहुरा समाचारदाता
धनगढी, ४ चैत । कैलालीके धनगढी उपमहानगरपालिकासे विवाह, व्रतबन्ध, सप्ताह तथा टमान चाडपर्वके अवसरमे माइक, डिजे लगायत विद्युतीय बाजा भारी आवाजमे नैबजैना आग्रह करले बा ।
प्रमुख प्रशासकीय अधिकृत नरेन्द्रबहादुर खातीसे जारी सूचनामे यैसिन उपकरणसँगे प्रेसर हर्न नैबजैना ओ पटाका नैपट्कैना समेत अनुरोध करल बा ।
उपमहानगरपालिकाके अनुसार ध्वनि प्रदूषणके कारण नगरवासीमे नकारात्मक असर परल बा । विशेष करके वृद्धवृद्धा, बालबालिका तथा मुटुरोगीहे स्वास्थ्यसम्बन्धी थप समस्या डेखल उल्लेख करल बा ।
नगरवासीसे बार बार गुनासो अइटी रहल ओ ध्वनि प्रदूषणसे वातावरणमे समेत असर पर्ना हुइल ओरसे राष्ट्रिय ध्वनि प्रदूषण मापदण्ड २०६९ अनुसार नियन्त्रणके लाग यी निर्णय लेहल जनाइल बा ।
सूचनामे उल्लिखित निर्देशन अटेर करके विद्युतीय बाजा प्रयोग करलेसे प्रचलित कानुनअनुसार कारबाही कैना चेतावनी समेत डेहल बा ।
