कैलालीमे ट्रकसे मच्याइल डल्लवहे ठक्कर डेहेबेर गोसिया गोसिनीयाके मृत्यु
पहुरा समाचारदाता
धनगढी, ५ चैत । कैलालीमे ट्रकसे मच्याइल डल्लवहे पाछेसे ठक्कर डेहेबेर गोसिया÷गोसिनीयके मृत्यु हुइल बा ।
कैलालीके कैलारी गाउँपालिका–५ बजैपुर स्थित ना ६ ख ७७८ नम्बरके ट्रकसे डल्लवहे पाछेसे ठक्कर डेहेबेर सवार कैलारी गाउँपालिका–५ पवेरा निवासी ६० वर्षीय कलेसु चौधरी ओ उहाँक गोसिनीय ७० वर्षके सितारानी चौधरीके वुधके रात मृत्यु हुइल हो ।
दुर्घटनामे गम्भीर घाहिल हुइल दुनु जानेक सेती प्रादेशीक अस्पताल धनगढी लैगिलमे सितारानी चौधरीहे चिकित्सकसे चेकजाँच करेबेर मृत घोषणा करल ओ कलेसु चौधरीके उपचारके क्रममे मृत्यु हुइल जिल्ला प्रहरी कार्यालय कैलाली जनैले बा ।
डल्लवमे मच्याइल एक ठो बरदा मरल बा कलेसे एक ठो बरदा घाहिल हुइल बा । ट्रक ओ ट्रक चालक धनगढी उपमहानगरपालिका–३ बोराडाँडी बैठना ३३ वर्षीय रुबिन थापामगरहे प्रहरीसे नियन्त्रणमे लेहल जनैले बा । दुर्घटना सम्बन्धमे प्रहरीसे आवश्यक अनुसन्धान करटी रहल जनैल बा ।
