होटल व्यवसायसे मासिक दुई लाख कमैटी विवेक
पहुरा समाचारदाता
धनगढी, ९ भदौ । कैलालीके धनगढी उपमहानगरपालिका–७ जाखोरतालके विवेक चौधरी ‘माछाघर’ नामक होटल सञ्चालन करटी आइल बटै ।
विगत अढाइ वर्षसे ‘माछाघर’ सञ्चालन करटी आइल चौधरी मनग्य आम्दानी करटी आइल बटै । उहाँ सञ्चालन करल ‘माछाघर’ होटल उहाँक आम्दानीके मुख्य स्रोत केल्ह नाही, अन्य छ जानेक रोजगारीके माध्यमफे बनल ।
उमेरसे ३१ वर्षीय चौधरी अढाई वर्षआघे १५ लाख लगानीमे सुरु करल होटल व्यवसाय अब्बे विस्तार करटी लैगिल बटै । कमाइ मजा हुइ लागलपाछे होटल विस्तार करल उहाँ बटैलै । उहाँ अब्बे करिब ५० लाख लगानी पुगसेकल बटैलै ।
उहाँ होटलमे खाजा ओ खानाके साथे स्थानीय थारु परिकारहे प्राथमिकता डेना करल बटैलै । ‘हमार यहाँ खाना तथा नास्ता पाजाइठ । विशेष करके थारु परिकारके यहाँ स्वाद लेहे पजाइठ’ उहाँ कहलै ‘थारु परिकारके स्वाद लेहे चहुइयाके लाग अनदीके भात, ढिक्री, बयरके चटनी, घोँगी, गेगटालगायतके परिकार बनैना करल बटी ।’
ओस्टे, उहाँ पोखरीमे पालन करल मच्छी, लडियाके लोकलमच्छरीके परिकारसमेत बनैना करल बटैटी मच्छरीके सक्कु परिकार बनैना करल बटैलै । स्थानीय स्वाद ओ मौलिक परिकारहे प्राथमिकता डेहेबेर ग्राहकके आकर्षण बह्रल उहाँक कहाई बा ।
चौधरी विगतमे कैलाली उद्योग वाणिज्य संघमे सामान्य रोजगारी करिट । उहाँ कहलै ‘मै पहिले उद्योग वाणिज्य संघमे मासिक आठ हजारमे काम करु । जागिरसेसेफे अपनही कुछ करेपरठ कहिके होटेल व्यवसायमे लागल हुँ ।’
उहाँ होटल व्यवसायसे आम्दानीफे मजा हुइना करल बटैलै । होटलके आम्दानीसे घर खर्चसंगे हुइना करल उहाँ बटैलै । उहाँ कहलै ‘अब्बे कमाईफे मजा बा । मासिक दुई लाख जति आम्दानी हुइठ । पाँच जानेक परिवार बा । सक्कु घरखर्च, छावा छाईक पढाइलेखाइ खर्च, औषधोपचार, लुगाफाटा, खाद्यान्न लगायतके व्यवस्था कैना सहज हुइल बा ।’
उहाँ होटेल व्यवसाय स्वरोजगार हुसेकल बटैलै । उहाँ कहलै ‘मै केल्ह स्वरोजगार हुइल नैहुँ, छ जनहनहे रोजगारी समेत डेले बटु ।’
उहाँ लगनशील हुके व्यवसायमे लग्लेसे सफल हुइना बटैलै । उहाँ कहलै ‘जौनफे व्यवसायमेफे मेहनत करेपरठ, लगनशील हुके काम करलेसे सफल हुजाइठ । रोजगारीके लाग विदेश जाई परठ कना नैहो । नेपालमे मजा कमाइ करे सेक्जाइठ ।’
