फरार ११ प्रतिबादी पक्राउ
पहुरा समाचारदाता
धनगढी, ९ भदौ । कैलालीके अलग अलग ठाउँसे टमान मुद्दा लागके फरार रहल ११ जाने प्रतिवादी पक्राउ परल बटै ।
फैसला कार्यान्वयनके सिलसिलामे जिल्ला अदालत कैलालीके टमान मितिके फैसलासे कैद सजाय ओ जरिवाना ठहर हुइ फरार रहल उहाँहुकन सोम्मारके रोज पक्राउ कैगिल हो ।
जिल्ला प्रहरी कार्यालय कैलाली मातहत कार्यालयसे खटल प्रहरीसे ठगी सम्बन्धि मुद्दामे ६ महिना कैद सजाय ओ रु.३० हजार जरिवाना तोकल लम्कीचुहा न.पा.१० बैठना वर्ष ३२ के श्याम बहादुर चौधरी, बैङ्किङ कसुर मुद्दामे १ दिन कैद सजाय ओ रु.१ हजार ५ सय १० रुपयाँ जरिवाना तोकल लम्कीचुहा न.पा. १ बैठना राज बहादुर थापाहे पक्राउ करले बा ।
ओस्टेक करके, चेक अनादर मुद्दामे २ महिना कैद सजाय ओ रु.२ हजार जरिवाना तोकल लम्कीचुहा न.पा. १ बैठना केशवराज जैशी, लिखित सम्बन्धि कसुर मुद्दामे ५ महिना १५ दिन कैद तोकल लम्कीचुहा न.पा.१० बैठना खेम बहादुर चौधरीहे पक्राउ करले बा ।
ओस्टे करके बोक्सिन्या सम्बन्धि आरोप मुद्दामे १ वर्ष कैद सजाय ओ रु. ५० हजार जनही तोकल टीकापुर न.पा.७ वैदी बैठना बर्ष २७ के सुनिल मिस्त्री, वडा–९ बौनिया बैठना वर्ष ३४ के हिरामोती डगौरा थारु ओ वर्ष ४५ के लाली डगौराहे पक्राउ करले बा ।
ओस्टेक, बोक्सि सम्बन्धि आरोप मुद्दामे १ वर्ष कैद सजाय ओ रु १५ हजार जनही तोकल भजनी न.पा.१ गौनहिया बैठना वर्ष ५० के जयराम डगौरा, वर्ष ४४ के पदम डगौरा, वर्ष ४५ के लहानु डगौरा ओ वर्ष ५४ के बाबुराम डगौराहे प्रहरी पक्राउ करले बा ।
