विनाशकारी बाढसे मृतकके संख्या २७० पुगल
पहुरा समाचारदाता
काठमाडौँ, ११ भदौ । रसुवाके भोटेकोशीमे आइलके बाढमे परके मृत्यु हुइल संख्या २७० पुगल बा । अब्बेसम २७० जानेके शव भेटल प्रहरी प्रधान कार्यालयसे जनैले बा ।
रसुवामे १७ जानेके शव भेटल बा । नुवाकोटमे १२ जाने, धादिङमे २७ ओ चितवनमे १०८ जानेक शव फेला परल बा ।
गोरखामे २० जाने, तनहुँमे ९ जाने, नवलपरासी पूर्वमे ६२ जाने ओ नवलपरासी पश्चिममे १५ जानेके शव फेला परल प्रहरी प्रधान कार्यालय स्थित केन्द्रीय समाचार कक्ष जनैले बा ।
केन्द्रके प्रमुख फडेन्द्रप्रसाद पौडेलके अनुसार बेपत्ता सुरक्षाकर्मीमे नेपाली सेनाके ४४, नेपाल प्रहरीके २८ ओ सशस्त्र प्रहरी बलके १३ जाने रहल बटै । अन्य बेपत्तामे रसुवाके १६१ ओ नुवाकोटके एक जाने बटै ।
ओस्टे ५७९ जाने पर्यटकफे सम्पर्कविहीन बनल बटै । सम्पर्कविहीन हुइनामे ११३ नेपाली ओ ४६६ विदेशी पर्यटक रहल मन्त्रालयसे जर्नले बा ।
विपद परलके १०४ जनहनके सफल उद्धार करल बा । उद्धार करल मध्ये रसुवाके ४३, नुवाकोटके ५८ ओ धादिङके तीन जाने बटै । फेला परलके कतिपय शव क्षतविक्षत अवस्थामे रहल जानकारी पौडेल देले बटै ।
मन्त्रालयसे सूचनाके संवेदनशीलताहे ध्यानमे राख्टी आधिकारिक निकायसे सम्प्रेषित समाचारहे किल विश्वास कैना आम नागरिकहे अनुरोध करल बा ।
