उत्साह, उमङ्ग ओ खुशीयाली नैहो

पहुरा समाचारदाता
धनगढी, २० भदौ । हलिया मुक्ती आज १८ औं बरस पुगल बा, दिवसहे मनाईबेर हलिया समुदायसे उत्साह, उमङ्ग ओ खुशीयाली मनाई नैसेकल हो ।
नेपाल सरकार ओ हलिया महासंघ बिच हुइल ५ बुदे सम्झौताके भावना आ मर्म अनुरुप हलिया पुनःस्थापनाके कार्यमे अपेक्षाकृत रुपमे प्रगती हुई नैसेकल राष्ट्रिय मुक्त हलिया समाज महासंघ नेपालके केन्द्रीय अध्यक्ष रमेशराम कोली बटैलै । १८ औं मुक्तहलिया दिवसहे प्राप्त उपलब्धीके रक्षा करटी थप अधिकारके प्राप्तिके लाग संघर्षके रुपमे मनाई जैटी रहल बटी, उहाँ कहलै, नेपाल सरकारसे प्रतिबद्धता करल पुनःस्थापनाके समयावधी लम्बैटी जाके पुनःस्थापनाके पर्खाइमे रहल मुक्त हलियाहुकनके बसोबासके उचित व्यवस्थापन हुई नैसेकल हो । उहाँ कहलै, तत्कालिन समयमे लगतमे नाम छुटल मुक्त हलियाके पहिचान हुई नैसेकल हो, पुनःस्थापनाके साथ–साथै शिक्षा, स्वास्थ्य, रोजगारी, दिगोजिवीकोपार्जन, सामाजिक सशक्तिकरण ओ समावेशीकरण सम्बन्धी मुद्दाहे सरकारसे विशेष प्राथमिकतामे धारके प्रभावकारी रुपमे कार्यान्वयन करे नैसेक्के बाँधा श्रमसे मुक्त हुइल १८ बर्ष विटलेसेफे मुक्तहलिया सम्मानित जीवन व्यतित करे सेकल नैहुइट ।
२०७८ सालमे नेपाल सरकारसे पुर्व वधुवा श्रमिकहुकनके अवस्था अध्ययनके लाग मानव अधिकारकर्मी श्याम श्रेष्ठके नेतृत्वमे गठित अध्ययन कार्यदलसे नेपाल सरकार समक्ष पेश करल सिफारिस सहितके प्रतिवेदन हालसमफे कार्यान्वयन हुई नैसेकल संविधान सभा सदस्य हरिश्रीपाइली बटैलै ।
कार्यदलसे पेश करल प्रतिबेदनके प्रभावकारी कार्यान्वयनके लाग नेपाल सरकार समक्ष उहाँ माग करलै । उहाँ नेपाल सरकार ओ मुक्त हलिया बिच हुइल ५ बुदे सहमति, १० बुदे सिफारिस ओ ५ सदस्यीय वस्तुस्थिती अध्ययन कार्यदलके प्रतिवेदनहे तत्काल कार्यान्वयनके प्रक्रियामे लैजैना ओ मुक्तहलिया समुदायके दीगो ओ न्यायोचित पुनःस्थानपनाके लाग तीनु तहके सरकारस.ग माग करलै ।
सुदुरपश्चिम प्रदेश सरकारसे वि.स. २०८० सालमे मुक्त हलिया, कमैया, कम्लहरी पुर्नस्थापना कार्यबधि पारित करके प्रत्येक बर्ष कुछ मात्रामे बजेट बिनियोजन करलेसेफे बजेटके प्रभावकारी कार्यान्वयन हुई नैसेक्के बिनियोजित बजेट फ्रिज हुके आवास निर्माणके काम सम्पन्न हुई नैसेकल उहाँ बटैलै । चालु आ.ब.ममे मुक्त हलियाहे प्राथमिकतामे धारके प्रयाप्त बजेट बिनियोजन करके मुक्त हलियाके न्यायोचित पुर्नस्थापनाके लाग प्रदेश सरकार समक्ष जोडदार माग करल बा ।
संस्थाके नेतृत्वमे हुइल पैरवीसे सुदुरपश्चिम प्रदेश ओ कर्णाली प्रदेशके ३५ ठो स्थानीय तहसे मुक्त हलिया पुनःस्थापना कार्यविधि पारित करले बटै ओ मुक्त हलियाके पक्षमे नीति तर्जुमा करुइया स्थानीय तहहे धन्यवाद डेहल बा । अन्य स्थानीय तहहेफे मुक्त हलियाके पक्षमे नीतिगत व्यवस्था करके मुक्त हलिया पुनःस्थापनाके कार्यहे प्राथमिकता डेना आग्रह करल बा ।
हलिया मुक्ति लगायत सक्कु मेरिक बाध्यकारी श्रमिकके रुपमे काम करटी रहल श्रमिक वर्गहे दासत्वके बन्धनसे मुक्त कैना ओ आर्थिक, सामाजिक, सांस्कृतीक तथा राजनीतिक अधिकारहे सुनिश्चित करके राज्यके मुलप्रवाहमे ल्यानके सम्मानित जीवन व्यतित कैना वातावरण तयार कैना कार्यमे सक्कुहुनके सहयोग, समर्थन ओ ऐक्वद्धताके लाग हार्दिक अपिल करल बा ।