बादी ओ दलित समुदायके अधिकार सुनिश्चित कैना सरकार गम्भीर बा ः मुख्यमन्त्री भट्ट
पहुरा समाचारदाता
धनगढी, २५ भदौ । सुदूरपश्चिम प्रदेशके मुख्यमन्त्री खगराज भट्ट प्रदेश सरकार बादी ओ दलित समुदायके अधिकार सुनिश्चित कैना गम्भीर रहल बटैले बटै ।
सुदुरपश्चिम प्रदेश वादी उत्थान विकास समितिके सम्मेलनमे बोल्टी मुख्यमन्त्री भट्टसे प्रदेश सरकार गरिव, असहाय ओ भुइँमान्छेके सरकारके रूपमे स्थापित कैना करके अइना बजेट तथा कार्यक्रम निर्माणके तयारी हुइटी रहल उहाँ बटैलै । महिला, गरिब, असहाय, बालबालिका, नवयुवा, वादी तथा सुकुम्बासी समुदायमैत्री सरकार निर्माणसंंगे सुशासनयुक्त शासन व्यवस्थाहे प्राथमिकतामे धारके बजेट निर्माणके तयारी समेत हुइटी रहल उहाँके कहाई रहल बा ।
उहाँ राज्यमे अभिनफे असमानता ओ विभेद कायम रहल कहटी ओकर अन्त्यके लाग राज्यसे करेपर्ना ढेर काम बाँकी रहल उल्लेख करलै । दसवर्षे जनयुद्धसे दलित तथा वादी समुदायउप्पर हुइना ढेर मेरिक विभेद अन्त्य कैना महत्वपूर्ण भूमिका खेलल उहाँके कहाई रहे ।
मुख्यमन्त्री भट्टसे अइना बजेटमे ‘दलित अधिकार दशक’ के रूपमे विशेष कार्यक्रम ल्यन्ना तयारी हुइटी रहल बटैलै । दलित समुदायउप्परके छुवाछुत पूर्ण रूपमे अन्त्य करटी ओृइनके आर्थिक तथा सामाजिक जीवनमे परिवर्तन ल्यन्ना करके कार्यक्रम तथा योजना आघे बह्रैना उहाँ बटैलै ।
प्रदेशके औचित्य पुष्टि हुइना करके बजेट निर्माण कैना उल्लेख करटी मुख्यमन्त्री भट्टसे बादी समुदायके समस्या समाधान कैना प्रदेश सरकार प्रतिवद्ध रहल बटैलै । राज्यसे अभिन ढेर विभेदके अन्त्य कैना बाँकी रहल कहटी उहाँ सक्कु समुदायके पहिचान, आत्मसम्मान ओ अधिकार सुनिश्चित करेपर्नामे जोड डेलै ।
दलित समुदायभिटर रहल विभेद ओ छुवाछुटके समेत अन्त्य कैना आवश्यक रहल उहाँके कहाई रहे समानता, सामाजिक न्याय ओ सम्मानमे आधारित समाज निर्माणके लाग प्रदेश सरकारसे अइना बजेटमार्फत विशेष पहल कैना मुख्यमन्त्री भट्ट बटैलै ।
