बाल संरक्षणके सवाल सम्बन्धी अन्तरक्रिया

पहुरा समाचारदाता
धनगढी, २ कुवाँर । बाल संरक्षणके सवाल सम्बन्धी सरोकारवाला निकायसे अन्तरक्रिया कार्यक्रम कैगिल बा ।
सिविन नेपाल ओ यार्ड के संयूक्त आयोजनामे शुकके रोज सरोकारवाला निकायसे अन्तरक्रिया कार्यक्रम कैगिल हो । सिविन नेपालके कार्यसमिति सदस्य तपेन्द्र भुषालके अध्यक्षतामे हुइल कार्यक्रममे जिल्ला प्रशासन कार्यालय कैलालीके प्रमुख जिल्ला अधिकारी हिरालाल रेग्मी प्रमुख अतिथि रहल रहिट । कार्यक्रममे उहाँ अब्बेक बालबालिका स्मार्ट रहल मने पहिलेक बालबालिका जस्टे मेहनत कम करल बटैलै । बालबालिका संरक्षण तथा हकअधिकारके लाग टमान कानून बनल ओरसे कोई बालबालिका अपनेहुक्रे पाई अधिकारसे बञ्चित हुई नैपर्ना बटैलै ।
धनगढी उपमहानगरपालिका वडा नम्बर १२ के वडा अध्यक्ष शेरबहादुर महरा वडा कार्यालयसे बालबालिकाहुक्रे पाई पर्ना सेवा प्रदान करटी रहल बटैलै । उहाँ कहलै, नागरिकताके सिफारिस, जन्मदर्ता, विवाह दर्ता, मृत्यु दर्तालगायत वडा कार्यालयके अधिकारके क्षेत्रमे रहल बा । ऐन कानूनहे टेक्कु सक्कु सेवा डेटी रहल बटी ।
शान्ति पुनस्र्थापना गृहके जिल्ला संयोजक कैलाशो राना सिमानाकामे उद्धार करल बालबालिकाहे नेपाल लौटाइल मने कतिपय भर अभिभावक अपनही नैस्विकार करल अवस्थामे कर्रा रहल बटैली । कार्यक्रममे हिमाल रोकाया अपाङगता रहल बालबालिका सबसे ढेर समस्यामे रहल बटैलै । उहाँ भौतिक संरचनाके बनावटके कारण सेवासे बञ्चित हुइल ओ सूचनाके पहुँचसे बञ्चितफे हुइल बटैलै ।
पिसविन कैलालीके कार्यक्रम संयोजक हर्क बहादुर ओली, सुदूरपश्चिम बाल संजालके अध्यक्ष मात्रिका प्रसाद रेग्मीलगायत आपन बाट राखल रहिट । कार्यक्रममे सिविन नेपालके प्रबन्धक सागर भण्डारी बाल संरक्षण सम्बन्धी बनल ऐन, प्रवाधान ओ प्रदेश, स्थानीय तह, वडा स्तरमे बनल बाल अधिकार समितिके काम कर्तव्य अधिकारबारे जानकारी डेहल रहिट । कार्यक्रमके स्वागत तथा उद्देश्यबारे सिविन नेपालके प्रवन्धक भवगती श्रेष्ठ ओ संचालन तथा सहजीकरण सिविन नेपाल कैलालीके जिल्ला संयोजक हरिलाल चौधरी करल रहिट ।
कार्यक्रममे वडा अध्यक्षहुक्रे, बालबालिकाके क्षेत्रमे काम कैना टमान संघ संस्थाके प्रतिनिधिहुकनके सहभागिता रहे ।