समितिमे रहल विधेयकहे प्रदेशसभामे पेश कैना विषयमे छलफल
पहुरा समाचारदाता
धनगढी, १२ कार्तिक । सुदूरपश्चिम प्रदेशके निवर्तमान मुख्यमन्त्री कमलबहादुर शाह ओ प्रदेशसभा सामाजिक विकास समितिके सभापति धर्मराज पाठकबीच समितिमे दफावार छलफलके क्रममे रहल विधेयकहे शीघ्र टुङ्ग्याके प्रदेशसभामे पेश कैना विषयमे छलफल हुइल बा ।
नम्मा समयसे सामाजिक विकास समितिमे विचाराधीन रहल विधेयकमे दफावार छलफल सम्पन्न करके तत्काल प्रदेशसभामे पेश कैना ओ ऐनके रूपमे जारी कैना प्रक्रियाहे तीव्रता डेहेपर्ना विषयमे दुनहुनके बीच छलफल तथा सहमति हुइल हो ।
निवर्तमान मुख्यमन्त्री शाह नेतृत्वके सरकारसे ‘टीकापुर विज्ञान तथा प्रविधि विश्वविद्यालय सम्बन्धमे व्यवस्था कैना बनल विधेयक’२०८१ चैत ३ गते ओ ‘सुदूरपश्चिम प्रदेश बरघर र भलमन्सा प्रथा संरक्षण तथा विकास सम्बन्धमे व्यवस्था कैना बनल विधेयक’२०८२ जेठ २१ गते प्रदेशसभा सचिवालयमे दर्ता कराइल रहे ।
यी दुनु विधेयक नम्मा समयसम सदनके प्रक्रियामे आघे नैबह्रलपाछे २०८३ वैशाख १७ गते नेपाली कांग्रेस सुदूरपश्चिम प्रदेश संसदीय दलके बैठकसे अविलम्ब सदनमे पेश करके छलफल प्रक्रिया आघे बह्रैना सभामुखके ध्यानाकर्षण कराइल रहे ।
प्रदेशसभाके आठौँ अधिवेशनके दुसरा बैठकमे जेठ ११ गते दुनु विधेयक टेबल करल रहे । जेठ २० गते प्रदेशसभामे सामान्य छलफल हुइलपाछे जेठ २६ गते दफावार छलफलके लाग सामाजिक विकास समितिमे पठाइल रहे ।
समितिमे पठाइलपाछे छलफलके क्रममे रहल यी दुई विधेयकसहित अन्य विचाराधीन विधेयकहे समेत हाली टुङ्ग्याके प्रदेशसभामे पठाईपर्नामे शाह ओ सभापति पाठकबीच छलफल हुइल हो ।
नम्मा समयसम विधेयक समितिमे अल्झेबेर प्रदेशसभाके विधायिकी कार्यसम्पादन ओ संसदीय प्रक्रियाउप्पर प्रश्न उठ्न हुइल ओरसे जनसरोकार ओ प्रदेशके दीर्घकालीन विकाससंग जोरल विधेयकहुकनहे प्राथमिकताके साथ आघे बह्रार्इं पर्नामे जोड डेहल बा ।
