फुलवारीमे नगर अस्पताल संचालनमे
पहुरा समाचारदाता
धनगढी, १७ कार्तिक । धनगढी उपमहानगरपालिकासे फुलवारीमे सोम्मारके रोजसे फुलवारी नगर अस्पताल संचालनमे ल्यानले बा ।
उपमहानगरपालिकासे वडा नम्बर १४, १८ ओ १९ के स्थानीयबासीहुकनहे स्वास्थ्य उपचारमे सहजुले सेवा पाइट कहिके वडा–१८ के वडा कार्यालयसंग जोरल भवनमे फुलवारी नगर अस्पताल संचालनमे ल्यानल हो ।
धनगढी उपमहानगरपालिकाके नगर प्रमुख गोपालके विशेष उपस्थिति रहल एक कार्यक्रमके विच तीन वडाके वडाअध्यक्षहुक्रे संयूक्त रुपमे उ अस्पतालके उदघाटन करल रहिट । अस्पताल उदघाटनसंगे मंगरके रोजसे बहिरंग सेवा, फार्मेसी सेवा, प्रयोगशाला सेवा, एक्सरे सेवा संचालन हुइना जनागिल बा ।
उ अस्पतालहे पर्ना आवश्यक जनशक्तिके पदपूर्तिके लाग प्रक्रिया जारी रहल कहटी कुछ दिनमे आकस्मिक सेवा ओ आन्तरंङ सेवालगायत अन्य स्वास्थ्य सेवा समेट डेना जनागिल बा । उददघाटन कार्यक्रममे फुलवारीके टमान सांस्कृतिक झाँकीफे प्रस्तुत करल रहे । अपने क्षेत्रमे अस्पतालके उदघाटन हुइलपाछे सामान्य स्वास्थ्य उपचारके लाग धनगढी जाईपर्ना बाध्यके अन्त्य हुइल फुलवारीबासीहुक्रे बटैले बटै । फुलवारीके बालकुमारी सापकोटा अपन गाउँठाउे अस्पताल अस्पताल संचालनमे आइलपाछे बहुट खुशी लागल बटैली ।
