सुदूरपश्चिममे ‘अर्णव’ प्रभाव : डराइक नैपरी
पहुरा समाचारदाता
धनगढी, १३ कार्तिक । सुदूरपश्चिम प्रदेशमे आइ सेक्ना विपत् जोखिम न्यूनीकरणके लग प्रदेश सरकार तयारी अवस्थामे रहलके ओ इ बारे निरन्तर सूचना प्रवाह करनाके साथे सम्पूर्ण युनिटहे तयारी अवस्थामे राखल बङ्गालके खाडीमे विकसित शक्तिशाली अर्णव चक्रवातके प्रभावसे सुदूरपश्चिम प्रदेशमे कुछ प्रभाव डेखलमेफे डराइक पर्ना अवस्था नैरहल जल ओ मौसम विज्ञान कार्यालयसे जनैले बा ।
सुदूरपश्चिम प्रवेश करलसम शक्तिशाली चक्रवात न्यूनचापीय क्षेत्रमे परिणत हुइना सम्भावना रहलसे प्रदेशमे यकरके प्रभाव कम हुइना डेखल हो । चक्रवातके प्रभावके कारण सिमसिमे पानी भर पर्ना जल तथा मौसम विज्ञान कार्यालय महाकाली बेसिन अत्तरियाके प्रमुख इन्जिनियर सञ्जयकुमार शाह बटैलै ।
उहाँके अनुसार चक्रवात आइटी आइटी न्यूनचापीय क्षेत्रमे परिणत हुइटी कमजोर हुइना सम्भावना डेखल बा । यिहे करके बिफेक रातसे सिमसिमे पानी परलेसेफे खोलानालामे बाढ आइना सम्भावना भर नै डेखल हो मने पहिरो ओ हिमपातके जोखिम रहलके कारण सतर्क रहन भर जरुरी बा ।
जल तथा मौसम विज्ञान विभाग मौसम पूर्वानुमान महाशाखाके अनुसार ‘अर्णव’ चक्रवातके कारण सुदूरपश्चिम प्रदेशमे शुक ओ शनिच्चर दार्चुला, बझाङ ओ बाजुरामे भर हिमपातके सम्भावना रहल बा ।
हिमपातके कारण चिसो अत्यधिक बह्रलके कारण इ तिनु जिल्लाहे सन्तोला रङसे सङ्केत करके सतर्क रहन आग्रह करल बा । ओस्टेक तराईके कैलाली, कञ्चनपुर ओ पहाडी जिल्ला डोटी, अछाम, डडेलधुरा ओ बैतडीहे पियर रङसे सङ्केत करल बा ।
इ जिल्लाहे भर अद्यावधिक रहन आग्रह करल बा । चक्रवातके प्रभावसे करके प्रदेशके हिमाली क्षेत्रमे हिमपात हुइना ओ उहे करके जनजीवन प्रभावित हुइ सेक्ना हुइल तीनु जिल्लाहे सतर्कताके सूचीमे राखल इन्जिनियर साहके कहाइ बा । ‘अर्णव’ चक्रवातके प्रभावके कारण सुदूरपश्चिम प्रदेशमे उत्पन्न हुइ सेक्ना विपत् जोखिम न्यूनीकरणके लग प्रदेश सरकार तयारी अवस्थामे रहल बा ।
उ बारे निरन्तर सूचना प्रवाह करलके साथे हुइ सेक्ना जोखिम न्यूनीकरणके लग सम्पूर्ण युनिटहे तयारी अवस्थामे राखलके आन्तरिक मामिला तथा कानुनमन्त्री खुसीराम डगौरा थारू बटैलै । उहाँके अनुसार सरकारके रूपमे तयारी करल बा । सम्पूर्ण जिल्लाके सरोकारवाला निकायहे सतर्क रहेक लग निरन्तर सूचना प्रवाह हुइटी रहल बा ।
