धनगढी उप–महानगरपालिकासे १६ खेल मैदानमे ग्रासरुट लेभल फुटबल विकास कार्यक्रम सञ्चालन कैना
पहुरा समाचारदाता
धनगढी, १२ कार्तिक । धनगढी उपमहानगरपालिका ओ कैलाली जिल्ला फुटबल संघबीच सामुदायिक विद्यालय तथा सार्वजनिक खेल मैदानमे ग्रासरुट लेभल फुटबल विकास कार्यक्रम सञ्चालन कैना सम्बन्धमे सम्झौता हुइल बा ।
धनगढी उपमहानगरपालिकाके नगरप्रमुख गोपाल हमाल ओ कैलाली जिल्ला फुटबल संघके अध्यक्ष अनिल मल्लसे सम्झौतापत्रमे हस्ताक्षर करल हुइट । सम्झौताअनुसार धनगढी उपमहानगरपालिकाके टमान वडामे रहल सामुदायिक विद्यालय तथा सार्वजनिक खेल मैदानमे फुटबलके आधारभूत विकासका लाग कार्यक्रम सञ्चालन कैना बा ।
कार्यक्रमअन्तर्गत वडा नम्बर १ के कभर्डहल खेल मैदान, वडा नम्बर २ के सूक्ष्म वर्गीकरण लग्गेक खेल मैदान, वडा नम्बर ३ के प्रस्तावित नयाँ जस्पालके खेल मैदान, वडा नम्बर ५ के यातायात लग्गेक श्रीकृष्ण खेल मैदान, वडा नम्बर ६ के धनगढी पोलिटेक्निक खेल मैदान, वडा नम्बर ७ के पटेलामे रहल खेल मैदान, वडा नम्बर ८ के धनगढी नमुना माध्यमिक विद्यालयके खेल मैदान, वडा नम्बर ११ के दक्षिणकाली आधारभूत विद्यालयके खेल मैदान, वडा नम्बर १२ के मनकामना युवा क्लबके खेल मैदान, वडा नम्बर १३ के जनता राष्ट्रिय माध्यमिक विद्यालय ओ नवज्योति आधारभूत विद्यालय लग्गेक खेल मैदान, वडा नम्बर १४ के टाउन प्लानिङके खेल मैदान, वडा नम्बर १७ के पथरी पुल लग्गेक मैदान ओ डुमौलिया खेल मैदान, वडा नम्बर १८ के प्रस्तावित स्टेडियम खेल मैदान तथा वडा नम्बर १९ के फूलबारी माध्यमिक विद्यालयके खेल मैदानमे कार्यक्रम सञ्चालन कैना सम्झौतापत्रमे उल्लेख बा ।
स्थानीय तहमे फुटबलके आधार बल्गर बनैना, विद्यालय तथा सार्वजनिक खेल मैदानहे खेलकुद गतिविधिमे उपयोग कैना ओ बालबालिका तथा युवाहे फुटबल प्रशिक्षणके अवसर उपलब्ध करैना उद्देश्यसे कार्यक्रम सञ्चालन करे लागल हो । विगत २ वर्षसे धनगढी उपमहानगरपालिकासे ग्रासरुट फुटबल कार्यक्रम संचालन करटी आइल बा ।
