सुदूरपश्चिम महोत्सव अगहन २२ गतेसे
१५ करोडके कारोबार हुइना अपेक्षा
पहुरा समाचारदाता
धनगढी, २ अगहन । कैलाली उद्योग वाणिज्य संघके आयोजनामे हुइना सुदूरपश्चिम महोत्सव–२०८३ के तयारी अन्तिम चरणमे पुगल बा ।
संघसे अइना अगहन २२ गतेसे पुस ५ गतेसम धनगढी उपमहानगरपालिका–१, पशुपति टोलमे महोत्सव आयोजना करे लागल हो । सुदूरपश्चिम प्रदेशके पर्यटन, कृषि, उद्योग तथा व्यापारके प्रवद्र्धनसंगे स्थानीय कला, संस्कृति, भाषा ओ परम्पराके संरक्षण तथा प्रवद्र्धन कैना उद्देश्यसे महोत्सव आयोजना करे लागल संघसे जनैले बा ।
यी वर्षके महोत्सवमे बृहत् व्यावसायिक तथा कृषि प्रदर्शनीहे विशेष प्राथमिकता डेहल बा । कृषि क्षेत्रमे नवीनतम प्रविधि, ताजा तरकारी तथा कृषि उपजके प्रदर्शनीसंगे स्थानीय कृषि तथा व्यावसायिक उत्पादनहे विशेष रूपमे प्रदर्शनमे रख्ना बा ।
यिहीसे कृषक, उद्यमी तथा व्यवसायीहे अपन उत्पादनके बजारीकरण, प्रविधि आदानप्रदान ओ व्यावसायिक अवसर विस्तारमे सहयोग पुग्न अपेक्षा करल बा । महोत्सवमे सुदूरपश्चिमके मौलिक कला, संस्कृति, लोकगीत, लोकनृत्य तथा परम्पराहे प्राथमिकताके साथ प्रस्तुत कैना बा ।
स्थानीय तथा राष्ट्रिय कलाकारके सहभागिता रना महोत्सवमे भारतलगायत अन्य क्षेत्रसे सहभागी हुइना उद्योगी तथा व्यवसायीहे समेत सम्मानजनक सहभागिताके अवसर प्रदान कैना संघसे जनैले बा । कैलाली उद्योग वाणिज्य संघके अध्यक्ष पुष्करराज ओझासे महोत्सवहे केवल व्यापारिक तथा मनोरञ्जनात्मक कार्यक्रमके रूपमे नैहुके सुदूरपश्चिमके आर्थिक समृद्धि, उद्यमशीलता, पर्यटन विकास ओ स्थानीय उत्पादनके बजारीकरणसँग जोरल अभियानके रूपमे आघे बढाइल बटैले बटै ।
उहाँक अनुसार महोत्सवसे स्थानीय उत्पादन ओ महिला उद्यमशीलताहे प्रोत्साहन कैनाके साथे रोजगारी सिर्जना, लगानी आकर्षण ओ समग्र आर्थिक गतिविधि विस्तारमे योगदान पुगैना बा । महोत्सवसे सिकल सीप ओ अनुभवहे उपयोग करटी युवाहुक्रे अपन व्यवसाय सुरु करके उद्यमी बन्न सफल हुइल अध्यक्ष ओझाके कहाई बा । महोत्सवमे करिब चार करोड रुपैयाँ लगानी हुइना ओ अवधिभर करिब १५ करोड रुप्या बराबरके आर्थिक कारोबार हुइना अनुमान करल बा ।
कृषि, जडीबुटी, हस्तकला, फर्निचर, अटोमोबाइल, गार्मेन्ट, इलेक्ट्रोनिक्स, होटल तथा सूचना प्रविधिलगायत टमान क्षेत्रके करिब ४२५ ठो स्टल रना आयोजक जनैले बा । महोत्सवमे दर्शक आकर्षित कैना ‘अम्ब्रेला स्ट्रिट’ लगायतके आकर्षणसमेत रना बा ।
आयोजकके अनुसार महोत्सवमे करिब पाँच लाख दर्शक सहभागी हुइना अपेक्षा करल बा । कैलाली उद्योग वाणिज्य संघमे दर्ता हुके नवीकरण हुइल सदस्यहे महोत्सवमे निःशुल्क प्रवेशके व्यवस्था करल बा । महोत्सवहे व्यवस्थित, सुरक्षित ओ भव्य रूपमे सम्पन्न कैना मूल आयोजक समितिसहित २४ ठो उपसमिति गठन करके जिम्मेवारी बाँडफाँट करल बा ।
सुरक्षा व्यवस्थाहे विशेष प्राथमिकता डेटी महोत्सवस्थलमे निजी तथा सरकारी सुरक्षा जनशक्ति परिचालनके साथे आधुनिक सीसीटीभी क्यामेरामार्फत निरन्तर निगरानी कैना संघसे जनैले बा । मौसमी चुनौती तथा सम्भावित विपद् व्यवस्थापनहे मध्यनजर करटी धनगढी उपमहानगरपालिकामार्फत आवश्यक सुरक्षा सामग्री, दक्ष जनशक्ति तथा विपद् प्रतिकार्यके पूर्वतयारी सुनिश्चित कैना सम्बन्धित निकायसँग आग्रह करल अध्यक्ष ओझा बटैले बटै ।
संघसे सुदूरपश्चिम महोत्सवहे प्रदेशके आर्थिक समृद्धि, उद्यमशीलता, पर्यटन विकास तथा मौलिक कला–संस्कृतिके प्रवद्र्धन कैना महत्वपूर्ण अवसरके रूपमे लेहल जनैले बा ।

