हरैयामे थारु संग्रहालयके शिलान्यास
मौलिक संस्कृति संरक्षणमे टेवा
पहुरा समाचारदाता
धनगढी, ८ चैत । कैलालीके गोदावरी नगरपालिका–७, हरैयामे निर्माण हुइना थारु संग्रहालयके शनिच्चरके शिलान्यास करल बा ।
सुदूरपश्चिम प्रदेश सभा सदस्य चुनकुमारी चौधरी एक कार्यक्रमके बीच संग्रहालयके शिलान्यास करल रही । थारु समुदायके संस्कृतिके जगेर्ना कैना उद्देश्यसे उ ठाउँमे संग्रहालय निर्माण करे लागल हो ।
संग्रहालयके शिलान्यास कैटी प्रदेश सभा सदस्य चौधरी सक्कु जातजातिके संस्कृति संरक्षण कैना आवश्यक रहल बटैली । उहाँ अपने सक्कु जातजातिके संस्कृति जगेर्नाके लाग सहयोग करटी आइल उल्लेख करली ।
थारु संग्रहालय निर्माणसे थारु समुदायके संस्कृति संरक्षणमे सहयोग पुग्ना उल्लेख कैटी चौधरी थारु समुदायके मौलिकतानुसार नै संग्रहालय भवन बने पर्ना बटैली । ‘यदि, मौलिकतामे आधारित होके संरचना नैबनी कलेसे सङ्ग्रहालय बनैनाके औचित्य नैहरी,’ उहाँ कहली ।
स्थानीय पूर्वाधार विकास कार्यक्रम अन्तर्गत २० लाख रुपैयाँ लागतमे उ संग्रहालय निर्माण करे लागल हो । समितिके अध्यक्ष भीम चौधरी संग्रहालय निर्माणसे थारु समुदायके मौलिक संस्कृति संरक्षणमे टेवा पुग्ना बटैलै । ‘हमार चालचलन, लवाईखवाई भेषभूषा तीव्र रुपमे हेरैटी गैल बा,’ उहाँ कहलै, ‘संग्रहालय निर्माण कैके हम्रे ओइसीन चिजके संरक्षणके प्रयास करब ।’
थारु संग्रहालय घर थारु समुदायके मौलिकतामे आधारित हुइ पर्नामे जोड डेहल बा । ओस्टके, हरैयामे थारु सङ्ग्रहालय बनलमे उ क्षेत्रके थारु समुदायहे साँस्कृतिक सम्मान मिल्ना बटाइल बा । संग्रहालय बन्ना थारु समुदायके लाग अत्यन्त खुशीके विषय रहल थारु कल्याणकारिणी सभा कैलालीके उपाध्यक्ष माधव चौधरी बटैलै ।
‘यहाँ संग्रहालय बन्ना कहलक थारु समुदायहे साँस्कृतिक सम्मान मिल्ना हो,’ उहाँ कहलै, ‘हम्रे अब्बे थारु संस्कृतिबारे बुझे दाङ जैना करल बाटी । कमसेकम वहाँके मनै फेन यहोरिक संस्कृति बुझे कैलाली अइना मेरके संग्रहालय बनाइ परल ।’ उहाँ संग्रहालय थारु समुदायके परम्परागत घर अनुसार नै हुइ पर्ना बटैले ।
ओस्टके, वडाध्यक्ष हेमराज ओझा धर्म, संस्कृति जोगैना आवश्यक रहल उल्लेख करटी संग्रहालय निर्माण हुइ लागलपाछे ढिउर खुशी लागल बटैलै । ‘संग्रहालय निर्माणके लाग वडामे पत्र पुगलठेसे नै मै अत्यन्त खुशी हुइल रहुँ,’ उहाँ कहलै, ‘हमार वडामे थारु संग्रहालय बन्ना सक्कु वडावासीके लाग खुशीके बात हो ।’
उ अवसरमे समाजसेवी दम्बबहादुर बुढा, दानबहादुर शाह, हरैयाके स्थानीयवासी लगायतके उपस्थिति रहल रहे ।
