४६३ लौवा क्षयरोगीके विरामी फेला

पहुरा समाचारदाता
धनगढी, ११ चैत । कैलालीमे चालु आर्थिक वर्षके छ महिनामे चार सय ६३ लौवा क्षयरोगीके विरामी फेला परल बटै ।

विश्व क्षयरोग दिवसके अवसरमे स्वास्थ्य कार्यालय कैलालीसे मंगरके धनगढीमे आयोजित अन्तरक्रिया कार्यक्रममे चालु आर्थिक बर्षके अगहनसम ओटरा लौवा विमारी भेटल जनागिल बा । स्वास्थ्य कार्यालय कैलालीके प्रमुख लालबहादुर धामी आर्थिक वर्ष २०७५/७६ मे एक हजार ४१ लौव क्षयरोगके विरामी पहिचान करलमे आर्थिक वर्ष २०७६/७७ मे घटके नौ सय ४७ लौवा विरामी फेला परल जनैलै ।

कैलालीमे क्षयरोगके लौवा विरामीके पहिचान दरमे कमी अइटी रहल उहाँ जनैलै । स्वास्थ्य कार्यालय कैलालीसे उपलब्ध कराइल चार वर्षके तथ्यांक हेरेबेर लौवा क्षयरोगीके विरामी पहिचान कैना दर घटटी गैल विल्गाइल बा । स्वास्थ्य कार्यालय कैलालीके प्रमुख धामी कहलै –‘कैलालीमे वार्षिक दुई हजार पा“च सय ढेर क्षयरोगीके लौवा विरामी पहिचान करे पर्ना रहठ मने, हम्रे एक हजारसे ढेर लौवा विरामी फेला पारे सेकल नइहुई ।’

उहाँ समाजमे चेतना नइहुइना, नीजि अस्पतालमे पत्ता लागल विरामीहुकनहे सरकारी अस्पतालमे नइपुगैना लगायतके समस्यासे लक्ष्य अनुसारके लौवा विरामी पहिचान करे नइसेकल जनैलै । उहाँ कहलै–‘सक्कु क्षयरोगके विरामीहुकनके पहिचान करके उपचारके दायरामे नन्लेसे क्षयरोगके अन्त्य करे सेक्जाई ।’ कैलालीमे क्षयरोगके कारण चालु आर्थिक वर्षके छ महिनामे १४ जानेक मृत्यु हुसेकल बा ।

कार्यालय प्रमुख धामी कहलै –‘क्षयरोगके कारण पा“च जाने पुरुष ओ नौ महिला करके १४ जानेक मृत्यु हुइल बा ।’ उहाँ देशभरमे क्षयरोगके कारण मृत्यु हुइनाके दर दुई प्रतिशत रहलेसेफे सुदूरपश्चिम प्रदेशमे चारसे पा“च प्रतिशत रहल बटैलै । उहाँ समयमे क्षयरोगके पहिचान करके उपचार करे सेक्नामे मृत्युदर घटाई सेक्ना बटैलै ।

कैलालीमे क्षयरोगके नियन्त्रण ओ अन्त्य कैना बसाइसराई, नियमित औषधि सेवन नइकैना, आइसोलेसन वार्ड प्रर्याप्त नइहुइना, ढिला परिक्षण करैना लगायतके चुनौती रहल बटैलै । नुकके बैठल क्षयरोगी पत्ता लागल कारणसे बिरामी हाली ठिक हुइना, बिरामीके स्वास्थ्य अवस्था खराब हुइना बाँचे सेक्ना, अकालमे हुइना मृत्युसे जोगाई सेक्ना ओ सबसे सबल पक्षके रूपमे और व्यक्तिहे रोग सर्नसे बचाई सेक्ना उहाँ बटैलै । आज विश्व क्षयरोग दिवस, हरेक वर्ष टमान कार्यक्रम करके मनैटी आइल यी दिवस यी वर्ष भर भव्यताके साथ नइमनैना हुइल बा ।

कोरोना भाइरसका कारण स्वास्थ्य निर्देशनालय तथा मातहातके स्वास्थ्य कार्यालय भव्य कार्यक्रमके आयोजना करले नइहो । ‘संकेत समयके, क्षयरोगके अन्त्य’ कना नारा डेहल यी दिवसके पूर्व सन्ध्यामे मंगर कैलाली स्वास्थ्य कार्यालयसे अभिमुखीकरण कार्यक्रम करले बा ।

सोम्मार कार्यालयसे धनगढीमे रहल टमान नर्सिङ कलेजके विद्यार्थीहुकनहे कक्षामे जाके क्षयरोगबारे सचेतनामूलक कार्यक्रम करल रहे । हरेक बर्षके मार्च २४ विश्व क्षयरोग दिवस मनाजाइठ । क्षयरोग प्राचीन कालसे मानव समुदायमे रहल ओ टमान रोग ओ संक्रमणके रुपमे यिहीहे लेना करल पाइल बा ।

क्षयरोग ओ रेबिज केल यैसिन रोग हुइट जेकर उपस्थिती प्राचीन समयसे आजसम हुइल पाजाइठ । बिश्व जनसख्याके एकतिहाई जनसख्या क्षयरोगके किटाणुके संक्रमण जोखिममे रहल विल्गाइठ ।

विकासोन्मुख देशमे यी जोखिमदर टे झन बढके ९० प्रतिशतसम रहलफे विल्गाइठ । प्रतिबर्ष विश्वमे ८० लाख लौवा क्षयरोगी ठप्ठै कलेसे २० लाखके क्षयरोगके कारणसे मृत्यू हुइना करठ ।