मानवाधिकार संरक्षणके लाग अनुसन्धानमे जोड

पहुरा समाचारदाता
धनगढी, २१ चैत । सुदूरपश्चिम प्रदेशके आन्तरिक मामिला तथा कानूनमन्त्री प्रकाश शाह मानव अधिकार सुनिश्चितताके लाग कानूनी एवं विधिके शासनके कार्यान्वयन करेपरना बटैले बाटैं ।

राष्ट्रिय मानव अधिकार आयोगके छैटौं रणनीतिक योजना निर्माण सम्बन्धी धनगढीमे शुकके रोज हुइल परामर्श कार्यक्रममे कानूनमन्त्री शाह मानव अधिकार उलंघनके न्यूनीकरण करेक लाग निरंकुश शासनसत्ताहे हटाइपरना बटैलैं । उहाँ जनताहे मानव अधिकारके प्रत्याभूति कराइक लाग शक्तिके पाछे नैलागके सत्यके अनुसन्धान करके पीडितहे न्याय डेहेपरना आयोग अग्रसर रहे परना बटैलैं । ‘ठिक नीतिसे ठिक कानून बनठ,’ उहाँ कलैं, ‘अइसिके मानव अधिकारके संरक्षण हुइठ ।’

उहाँ मानव अधिकारके बारेमे राष्ट्रिय मानव अधिकार आयोगसे पैरवी प्रतिद्ध रहे परनामे जोड डेलैं । अस्टेके उहाँ मानव अधिकारके क्षेत्रमे प्रताडित समुदायहे कैसिक मानव अधिकारके प्रत्याभूति कराइ सेकजाइ कहिके छलफल करेपरना बटैलैं । उहाँ मानव अधिकारके संरक्षणके लाग प्रदेश सरकारके तरफसे प्रतिद्धता व्यक्त करलैं ।

कार्यक्रममे प्रदेश सांसद दुर्गा विक मानव अधिकार संरक्षणमे हुइल कमिकमजोरीहे सुधारके लैजाइपरना बटैलैं । उहाँ मानव अधिकार संरक्षणके लाग सहयोग, सहकार्य, समन्वय करके आघे बह्रनामे जोड डेली । ‘मानव अधिकारके घटनाहे अनुगमन करके सरकारहे निर्देशन डेहे परठ,’ उहाँ कली, ‘यकर लाग समन्वयके आवश्यक परठ ।’

ओस्टेक कार्यक्रममे राष्ट्रिय मानव अधिकार आयोगके उपसचिव पवनकुमार भट्ट आयोगके पाँचौं रणनीतिक योजनाके अवस्था ओ छैटौं रणनीतिक योजना निर्माण सम्बन्धी जानकारी करैले रहिट । उहाँ अन्सार छैटौं रणनीतिक योजनामे मानव अधिकार उलंघनके उजुरीके हलीसे हली अनुसन्धान करना ओ फछ्र्याैट करना, पाछेपारल वर्गके अधिकार सुनिश्चितता कैसिक करनामे जोड, मानव अधिकारके अवस्था नियमित ओ प्रभावकारी बनैना आयोगके प्राथमिकता डेना बटैलैं ।

उहाँ पाँचौं रणनीतिक योजनाके कुछ लक्ष्य पूरा हुइ नैसेकल बटैले रहिट । उहाँ अन्सार प्रतिवर्ष ८ सयके दरसे चार हजार ८ सय मानव अधिकार घटनाके अनुसन्धान करेपरनामे जम्मा तीन हजार छ सय १८ ठो किल मानव अधिकार घटनाके अनुसन्धान करे सेकल बटैलैं । उहाँ छैटौं रणनीतिक योजनाके उद्देश्य, मूल्य मान्यता, छलफलके विषय, रणनीतिक योजना कार्यान्वयनमे चुनौतीबारे जानकारी करैले रहिट ।

कार्यक्रममे राष्ट्रिय मानव अधिकार आयोगके सुदूरपश्चिम प्रदेश कार्यालय प्रमुख मोहनदेव जोशी आयोगके छैटौं रणनीतिक योजनाबारे जानकारी करैले रहिट । उहाँ आर्थिक वर्ष २०७६/०७७ से आर्थिक वर्ष २०८१/०८२ के लगायतके बारेके जानकारी करैटी करटी सम्मानपूर्वक बचेपैना अधिकार मानव अधिकार रहल बटैलैं । उहाँ मानव अधिकारप्रति राज्यके दायित्व फेन रहल बटैलैं । कार्यक्रममे अधिवक्ता जोहरीलाल चौधरी कोइ फेन केक्रो हक अधिकार हनन करी कलेसे उहिनहे कारवाहीके दायरामे नाने सेक्लेसे मानव अधिकारके घटना न्यूनीकरण करे सेकजिना बटैलैं । उहाँ पीडितहे न्याय डेहे सेक्लेसे राज्यके गरिमा, मानसम्मान बह्रना फेन बटैलैं ।

कार्यक्रममे फाया नेपालके अध्यक्ष शेरबहादुर बस्नेत, ओरेक नेपालके कार्यक्रम अधिकृत गीता चौधरी, न्यायाधिवक्ता सुरबहादुर परियार, अधिकारकर्मी गोमा आचार्य लगायत मन्तव्य व्यक्त करले रहिट । कार्यक्रमके सञ्चालन आयोगके रूपा निरौला करले रही ।