सामाजिक सशक्तिकरणसे केल विभेद अन्त्य
पहुरा समाचारदाता
धनगढी, २८ चैत । सामाजिक सशक्तिकरण करे सेक्लेसे किल समाजमे रहल छुवाछूत ओ विभेद अन्त्य हुइना एक कार्यक्रमके सहभागीहुक्रे बटैले बाटैं ।
दलित सेवा संघ सुदूरपश्चिम प्रदेश धनगढीसे शनिच्चरके रोज हुइल दलित सशक्तिकरण सम्बन्धमे व्यवस्था करना बनल विधेयक २०७७ बारे राय सुझाव संकलन सुदूरपश्चिम प्रदेशस्तरीय परामर्श कार्यक्रममे सहभागीहुक्रे समाजमे रहल विभेदहे हटाइक लाग पाछे पारल समुदायके सामाजिक, शैक्षिक, आर्थिक, राजनीतिक अवस्थाके सशक्तिकरण करनामे जोड डेले रहैं ।
सुदूरपश्चिम प्रदेशके सभामुख अर्जुनबहादुर थापा जातीय छुवाछुत ओ विभेद विरुद्धके ऐन, कानून बनैलेसे फेन यकर कार्यान्वयन तथा व्यवहारमे लागू नैहुइल बटैले बटैं । उहाँ दलित आन्दोलन ऐन कानून बनाइक लाग रहे, मने आबके दलित आन्दोलन उ ऐन, कानूनहे व्यवहारमे उतारेक लाग करेपरना बटैलैं । उहाँ जातीय छुवाछुतके संकीर्ण सोचके अन्त्यके लाग दलित सशक्तिकरणहे अभियानके रुपमे लैजाइ परना बटैलै ।
‘सामाजिक रुपान्तरण हुइल बा, मने छलफलमे नानके कानूनहे उपलब्धीमूलक बनैना बा,’ सभामुख थापा कहलैं, ‘जातीय छुवाछुतके विरुद्धके सुदूरपश्चिम प्रदेश सरकार दलित सशक्तिकरण विद्येयक नन्ना तयारीमे लागल बा ।’ यी विद्येयकमे दलित अधिकारके सुनिश्चितताके लाग जातीय विभेद तथा छुवाछुत कमिटी ओ दलित सशक्तिकरण कमिटी रहल उहाँ बटैलैं ।
सामाजिक विकास समितिके सभापति कुन्ती जोशी सामाजिक न्याय सुनिश्चितताके लाग जातीय विभेद अन्त्य करे परना बटैली । उहाँ दलित अधिकार सुनिश्चितताके लाग कानून एक हतियार हो, आब यी कानूनहे व्यवहारमे नानके कार्यान्वयन करनामे जोड डेली । उहाँ जातीय विभेदहे एक वर्गीय रुपमे व्याख्य करली ।
प्रदेश सांसद टेकबहादुर रैका दलित आन्दोलनहे और सशक्त ओ परिमार्जिक कैके आघे बह्राइपरनामे जोड डेलैं । उहाँ छुवाछुत विरुद्धके आन्दोलनहे अपने ठाउँ, स्थानीयस्तरके समाजहे रुपान्तरण करेपरना बटैलैं । जातीय विभेदके अन्त्यके लाग औरेक अस्रा नैकरके अपनही सशक्तहुके लागे परनामे समेट उहाँ जोर डेहल रहिट ।
प्रदेश सांसद उमादेवी वादी जातीय विभेदके कारण आम दलित किल नाइ सांसदहुक्रे फेन समस्यामे परल बटैली । उहाँ जातीय विभेदसे समाज अभिन बाहेर निक्रे नैसेकलमे दुःख व्यक्त करली ।
प्रदेश सभा सदस्य दुर्गा विक जातीय विभेदके कानून कार्यान्वयनके लाग सक्कु तहसे सरकारहे दवाव डेहेपरनामे जोड डेले रही ।
अधिवक्ता भोजमान लाम्बादे सुदूरपश्चिम प्रदेश सभासे बनाइल दलित सशक्तिकारण सम्बन्धमे व्यवस्था करना बनल विधेयकबारे कार्यक्रमपत्र प्रस्तुत करले रहैं । उहाँ विधेयकके बारेमे गहन छलफल करेपरना बटैलैं । उहाँ विधेयकमे रहल सबल पक्ष ओ कुछ थपे परना विषयके बारेमे जानकारी करैले रहैं ।
टक्कर ताम्राकार दलितहे व्यवसाय करेक लाग सहुलियत दरमे ऋण पाइ परनामे जोड डेले रहैं । उहाँ अति विपन्नहुकनहे न्यायिक भूमि वितरणके साथ निःशुल्क खाद्यान्नके व्यवस्था करेपरना बटैले बाटैं ।
शिक्षक गणेश नेपाली प्राविधिक ओ व्यवसायिक शिक्षामे फेन दलित विद्यार्थीहुकनहे छात्रबृत्ति ओ निःशुल्क शिक्षाके माग करलैं ।
राय सुझाव संकलन कार्यक्रममे डीएनएफके सचिव नरबहादुर विक, सर्मिला बागचन्द, वसन्त बागचन्दलगायत मन्तव्य व्यक्त करले रहैं । कार्यक्रम दलित सेवा संघके अध्यक्ष ईश्वरीप्रसाद विश्वकर्माके अध्यक्षतामे हुइल रहे ।
