कैलालीके पर्यटकीय स्थलमे आन्तरिक पर्यटक

पहुरा समाचारदाता
धनगढी, २ बैशाख । लावा बरसके दिन कैलालीके टमान स्थानमे रहल पर्यटकीय स्थलके आन्तरिक पर्यटक भ्रमण करले बाटै । जिल्लास्थित कर्णाली पुल, टीकापुर पार्क, खानीडाँडा, घोडाघोडी ताल, कोइलही ताल लगायतके घुमफिर कैना ओ पिकनिक मनुइया आन्तरिक पर्यटकहुक्रनके घुइँचो लागल रहे । लावा बरसके अवसर पारके कोरोना कहरके बीच आन्तरिक पर्यटक घुमघाम करल हुइट ।

इहे क्रममे जिल्लाके लम्कीचुहा नगरपालिका–३ स्थित चिसापानीमे रहल कर्णाली पुलमे आन्तरिक पर्यटकके भीडभाड रहल रहे । कर्णाली लडियामे रहल कर्णाली पुलके अवलोकन कैना ओ लावा बरसहे विशेष बनैना उद्देश्यसे आन्तरिक पर्यटक चिसापानी पुगल रहिट । पर्यटक चिसापानी बजार फेन भरिभराउ रहल रहिट ।

अब्बे दिन करिब १५ हजारसे ढिउर आन्तरिक पर्यटक कर्णाली पुलके भ्रमण, अवलोकन करल वडा अध्यक्ष भक्त चलाउने जानकारी डेलै । ओहकान अनुसार चिसापानीसे ठोरचे उप्पर रहल पितमारीमे पिकनिक खउइयानके फेन भीडभाड रहल रहे ।

लावा बरसके दिन बुटवल ओ भैरहवासमके आन्तरिक पर्यटक भ्रमण, अवलोकनके लाग चिसापानी पुगल वडा अध्यक्ष चलाउने बटैलै । ‘डुरसे आइल आन्तरिक पर्यटकहे हम्रे स्वागत ओ सम्मान फेन करले बाटी,’ उहाँ बटैलै । धनगढी, टीकापुर, महेन्द्रनगर, लम्की, नेपालगञ्ज, सुर्खेत लगायतके आन्तरिक पर्यटक अत्यधिक मात्रामे चिसापानीमे पुग्ना करल बाटै ।

लावा बरसके दिन आन्तरिक पर्यटकके चहलपहल हुइलपाछे व्यापार, व्यवसाय फेन फष्टाइल जनाइल बा । होटल पर्यटकस भरल रहे ।

कर्णाली पुलमे कैलाली होटल व्यवसायी संघसे ७८ ठो नेपाली झण्डसमेत राखल रहे । उहे बिच, पर्यटकके भीडभाड हुइलपाछे चिसापानीमे सुरक्षा व्यवस्था कडा पारल रहे ।

पाछेक समय टिकटक बनैना चक्करमे कतिपयके ज्यान जैटी रहल बा । कुछ दिन आघे कर्णाली पुल तीन जाने किशोर कुडल रहिट ।

दुई जनहनके तत्काल सकुशस उद्धार करलेसे फेन एकजाने आभिन बेपत्ता रहल बाटै । पुनः ओइसीन घटना नैदोहरे डेना ओ सम्भावित औरे घटना रोकक् लाग लावा बरसके दिन चिसापानीमे सुरक्षा व्यवस्था कडा पारल वडा अध्यक्ष चलाउने बटैलै । उ दिन ढिउर संख्यामे नेपाल प्रहरी ओ सशस्त्र प्रहरी परिचालन करल रहिट ।