प्रतिनिधिसभाके २६ सांसद कोरोना संक्रमित
काठमाडौं, २५ वैशाख । संघीय संसद् प्रतिनिधिसभाके २६ सांसदहे कोरोना संक्रमण हुइल बा । प्रधानमन्त्री केपी शर्मा ओली संसद्के विश्वास अपनमे रहलके परीक्षण कराइक लाग वैशाख २७ गते बोलाइल प्रतिनिधिसभा अधिवेशन आघे संघीय संसद् सचिवालयसे कराइल पीसीआर परीक्षण ओ सांसदहुक्रे व्यक्तिगत रूपमे कराइल परीक्षणसे उ संख्यामे सांसद कोरोना संक्रमित पाइल हो ।
संघीय संसद् सचिवालय वैशाख २२, २३ ओ २४ गते दुई सय पाँच जहन सांसदके पीसीआर परीक्षण करैले रहे । जोनमध्ये १९ जानेमे कोरोना संक्रमण रहल रिपोर्ट आइल संघीय संसद् सचिवालयके प्रवक्ता रोजनाथ पाण्डे जानकारी डेलैं । १९ जाने सांसदमध्ये एक जाने राष्ट्रिय सभाका ओ बाँकी १८ जाने प्रतिनिधिसभाके रहल उहाँ बटैलैं ।
संघीय संसद्सँग सम्बन्धित एक हजार दुई सय ३५ जानेक पीसीआर परीक्षण करलमे१ सय ६० जहनहे कोरोना हुइल प्रवक्ता पाण्डे जानकारी डेलैं । जेम्ने सांसद संघीय संसद् सचिवालयके कर्मचारी, मर्यादापालक, सांसदके स्वकीय सचिव, सुरक्षाकर्मी, ससदीय बिटमे रिपोर्टिङ करना पत्रकार ओ संसद् भवन नयाँ बानेश्वरके कर्मचारी रहल बाटैं ।
पहिले पीसीआर परीक्षण कराइल थप ८ जाने सांसदहे फेन कोरोना संक्रमण हुइल बा । सांसद झलनाथ खनाल, बिना मगर, रघुवीर महासेठ, सुरेशकुमार राई, सुरेन्द्र कार्की (राम कार्की) मन्त्री जुलिकुमारी महतलगायत ८ जहनहे फेन कोरोना संक्रमण हुइल संसद् सचिवालय जनैले बा ।
प्रतिनिधिसभाके अभिन ५४ सांसदके पीसीआर रिपोर्ट संसद् सचिवालयसे प्राप्त करले नैहो । उहाँहुकनके पीसीआर परीक्षण हुइलपाछे वा रिपोर्ट प्राप्त हुइलपाछे कोरोना संक्रमित सांसदके यकिन संख्या पटा हुइना संसद् सचिवालयके कहाइ बा ।
कुछ सांसद काठमाडौं उपत्यका बाहेर रहल ओ उहाँहुकनहे अनिवार्य रूपमे पीसीआर परिक्षण करके अइना सन्देश पठाइल संसद्के स्वास्थ्य विभागके अधिकारी बटैले बाटैं । कुछ सांसद अप्नही पीसीआर कराइ गैल जानकारी डेहल अधिकारी बटैले बाटैं ।
प्रतिनिधिसभा बैठकमे कैसिक सहभागी करैना कना उपायबारे छलफल हुइटी
प्रधानमन्त्री विश्वासके मत लेहेक लाग आह्वान करल प्रतिनिधिसभाके बैठकमे कोरोना संक्रमित सांसदहे कैसिक सहभागी करैना कनाबारे सभामुख अग्निप्रसाद सापकोटा ओ संसद्के अधिकारी छलफल करटी बाटैं । सभामुख सापकोटा २० गते स्वास्थ्य क्षेत्रके विज्ञहुकनसँग छलफल कले रहैं ।
सभामुख सापकोटा प्रतिनिधिसभा बैठक सञ्चालनके लाग स्वास्थ्य सुरक्षा मापदण्डके विषयमे स्वास्थ्य क्षेत्रके विज्ञ विशेषज्ञहुक्रे नेपाल मेडिकल काउन्सिलके अध्यक्ष प्रा. डा. भगवान कोइराला, विज्ञ चिकित्सकहुक्रे डा. लोचन कार्की, डा. सुरेश तिवारी, डा. अनुप सुवेदी, डा. अमृत पोख्रेल, डा. सागरकुमार राजभण्डारीलयायतसँग सल्लाह करले रहैं ।
स्वास्थ्य क्षेत्रके विज्ञहुक्रे सरकार ओ विश्व स्वास्थ्य संगठनसे तोकल सब मापदण्ड पालना करके बैठक सञ्चालन करना सुझाव डेले रहैं । सांसदहुकनके पीसीआर परीक्षण करना, बोलेबेर मास्क नैखोल्ना, बैठल सिट परिवर्तन नैकरना, दूरी कायम करेपरना लगायतके सुझाव उहाँहुक्रे डेले रहैं ।
दुई दर्जनसे ढेर सांसद कोरोना संक्रमित पाइलपाछे प्रतिनिधिसभाके २७ गतेके बैठक कैसिक सञ्चालन करना ओ उहाँहुकनहे मतदानमे कैसिक सहभागी करैना कनाबारे सभामुख सापकोटा ओ संसद् सचिवालयके अधिकारी छलफलमे बाटैं ।
प्रतिनिधिसभाके सचिव गोपालनाथ योगी सांसदहुकनके मतदानके अधिकार सुनिश्चित हुइनामेरिक आघे बह्रैना कना छलफल हइटीरहल बटैलैं । उहाँ प्रतिनिधिसभा कार्यव्यवस्था परामर्श समितिके बैठकसे कोरोना संक्रमित सांसदहुकनहे कैसिक मतदानमे सहभागी करैना कना निर्णय लेना बटैलैं । ’कार्यव्यवस्था परामर्श समितिमे छलफल हुइलपाछे कैसिक आघे बह्रना कना तय हुइ । कोरोना संक्रमित माननीयहुक्रे भोट डारे पाइपरल, ओकर लाग कैसिक व्यवस्थापन करना कना विषय कार्यव्यवस्थासे टुंगो लगैना कना विषयमे परामर्श चलटा,’ सचिव योगी कलैं ।
कोरोना संक्रमण हुइल सांसदहुकनहे मतदानमे किल सहभागी करैना मने बोले नैडेना मेरिक व्यवस्थापन करना कि कना विषयमे फेन छलफल हुइटीरहल बुझगिल बा । कुछ सांसद अस्पताल भर्ना हुइल ओरसे उहाँहुकनहे कैसिक नन्ना कना विषयमे फेन संसद् सचिवालय कार्यव्यवस्था परामर्शके बैठकपाछे व्यवस्था करना अधिकारी बटैले बाटैं ।
– एजेन्सी
