काँग्रेस संसदीय दलके निर्णयः ओलीहे विश्वासके मत नैडेना
काठमाडौं, २५ वैशाख । प्रमुख प्रतिपक्ष काँग्रेसके संसदीय दलके बैठकसे प्रधानमन्त्री केपी शर्मा ओलीहे विश्वासके मत नैडेना निर्णय करले बा । आज (शनिच्चर) बैठल संसदीय दलके बैठकसे ओलीसे प्रधानमन्त्रीके लाग मागल विश्वासके मत नैडेना ओ औरे दलहे फेन विश्वासके प्रस्तावके विपक्षमे रहना आग्रह करना निर्णय करल हो ।
काँग्रेस सचेतक पुष्पा भुसालके अनुसार सरकार सम्पूर्ण रूपमे असफल हुसेकल ओरसे विश्वासके मत नैडेना संसदीय दलसे निर्णय करल हो । ’ओली सरकार संवैधानिक, राजनीतिक, नैतिक सक्कु हिसाबसे असफल हुइल ओरसे सरकारहे विश्वासके मत नैडेना निर्णय हुइल,’ उहाँ कलैं, ’संसद्मे रहल औरे दलहे फेन विश्वासके मतके विपक्षमे खडा हुइक लाग काँग्रेस संसदीय दल आग्रह करले बा ।’
ओली सरकारहे विश्वासके प्रस्तावमे असफल पारके अपन नेतृत्वमे सरकार गठन करना पहल करना निर्णय फेन काँग्रेस संसदीय दलसे करल भुसाल बटैलैं । ’वैकल्पिक सरकार काँग्रेसके नेतृत्वमे गठन करना पहल करना निर्णय फेन हुइल बा,’ उहाँ कलैं ।
अस्टेक, कोरोना भाइरसके संक्रमण नियन्त्रणमे सरकार गम्भीर नैरहल, खोप आयतमे कमिसन ओ भ्रष्टाचारमे संलग्न हुइल फेन संसदीय दल निष्कर्ष निकरले बा । सरकारहे जनताके स्वास्थ्यप्रति गम्भीर बन्ना ओ अक्सिजन, भेन्टिलेटरलगायतके स्वास्थ्य उपकरण व्यवस्था करना ध्यानाकर्षण करैना काँग्रेस निर्णय करले बा ।
बैठकमे संवैधानिक परिषद् सम्बन्धि अध्यादेश ओ परिषद्के बैठकबारे छलफल हुइल भुसाल बटैलैं । उहाँ कलैं, ’संवैधानिक परिषद्के अध्यादेश बारम्बार असंवैधानिक तवरसे नन्ना ओ ओहेअनुसार परिषद् चलाइ खोजल डेखाइल बा । यीबारे बैठक प्रमुख प्रतिपक्ष दलके नेता बैठकमे नैजैना ओ औरेहे फेन उ परिषद्के बैठकमे सहभागी नैहुइना आग्रह करना कना निर्णय हुइल ।’
बैठकमे अविश्वासके प्रस्तावबारे फेन छलफल हुइल मने अब्बेक लाग विश्वासके मत लेना प्रधानमन्त्रीसे तयारी करल ओरसे उहिनहे असफल पर्ना निर्णय हुइल उहाँ जानकारी डेली ।
वैशाख २७ गते प्रतिनिधिसभामे प्रधानमन्त्रीसे विश्वासके मत मग्ना पहिल काँग्रेसके संसदीय दल बैठक बैठल हो ।
