अब्बे नेपाललगायतके मुलुकहे फेन आपत्कालीन सहयोग चाहल बाः डब्लूएचओ
काठमाडौं, १ जेष्ठ । विश्व स्वास्थ्य संगठन(डब्लूएचओ) पाछेक समय कोरोना भाइरस संक्रमण तीव्र हुइल ओरसे नेपालहे आपत्कालीन सहयोग चाहल बटैले बा ।
शुकके जेनेभामा आयोजित नियमित पत्रकार सम्मेलनके क्रममे डब्लूएचओके महानिर्देशक डा. टेड्रोस एडहानोम गेहब्रेयसस पाछेक समय भारतके साथे नेपाल, श्रीलंका, भियतनाम, कम्बोडिया, थाइल्यान्ड ओ इजिप्टलगायतके मुलुकमे फेन कोरोना संक्रमण तीव्र बनलपाछे समस्या उत्पन्न हुइल बटैलैं । उहाँ यी मुलुकमे पाछेक समय संक्रमण बह्रल ओ अस्पताल भर्ना हुइनाके संख्या फेन बह्रल बटैले बाटैं ।
उहाँ पाछेक समय डब्लूएचओ भारतमे अक्सिजन कन्सनट्रेटर, घुम्ती अस्थायी अस्पताल निर्माणके लाग टेन्टलगायतके स्वास्थ्य सामग्री पठाइल फेन जानकारी डेले बा ।
कुछ अमेरिकी मुलुकमे अभिन फेन कोरोना संक्रमण उच्च रहल निर्देशक गेहब्रेयससके कहाइ बा । गैल हप्ता कोरोना संक्रमणसे मृत्यु हुइलमध्ये ४० प्रतिशत अमेरिकी क्षेत्रके रहल उहाँ बटैलैं ।
कोरोना भाइरससे अभिनसम ३३ लाखसे ढेर ज्यान गुमासेकल उल्लेख करटी उहाँ पहिलसे दोसर लहर और घातक रहल बटैलैं ।
संक्रमण बह्रके खोप आपूर्ति ओ व्यवस्थापन अब्बेक मुख्य चुनौतीके रुपमे रहल फेन उहाँ बटैलैं । यिहे हप्ता विश्वके कुछ सरकारप्रमुख ओ खोप निर्माता कम्पनीसे यी समस्याहे सम्बोधन करना काम सुरु करल उल्लेख करटी ओम्ने अप्ने खुसी रहल फेन उहाँ बटैलैं ।
महानिर्देशक गेहब्रेयसस कुछ धनी मुलुक खोपके ढेर मात्रा किनल ओ न्यून जोखिममे रहल समूहहे खोप लगाइल बटैलैं । कुछ मुलुक बालबालिका ओ किशोरकिशोरीहे खोप लगैटीरहल उल्लेख करटी उहाँ यिहिनहे पुनर्विचार करके उ खोप विश्वव्यापी खोप परियोजना ‘कोभ्याक्स’ हे डेना फेन अनुरोध करले बाटैं ।
न्यून आय ओ मध्यम आय रहल मुलुकमे अभिन फेन खोप आपूर्ति सहज नैरहल उहाँक कहाइ बा । अभिन फेन उ मुलुकमे कोरोना संक्रमितके जीवन बचैना रातदिन खटल स्वास्थ्यकर्मी खोप लगाइ नैपाइल उहाँ बटैलैं । अभिनसम न्यून आय रहल मुलुकमे ०.३ प्रतिशत किल खोप आपूर्ति रहल उहाँ बटैलैं ।
