कक्षा १२ के परीक्षा होम सेन्टरसे
काठमाडौं, १३ सावन । कक्षा १२ के परीक्षा होम सेन्टरसे हुइना हुइल बा । कोरोना भाइरसके संक्रमणके जोखिमहे ख्याल करके यीबेर होमसेन्टरसे परीक्षा लेना तय हुइल राष्ट्रिय परीक्षा बोर्डके सदस्य सचिव दुर्गा अर्याल जानकारी डेलैं ।
बुधके संसदके शिक्षा तथा स्वास्थ समितिके बैठकमे बोल्टि सदस्य सचिव अर्याल कलैं, “औरे ठाउँमे गैलेसे यातायातके समस्या हुइना, विद्यार्थी कोठा खोजके बैठेपरना, अइसिन कार्यसे कोरोना जोखिमहे फेन थप बह्राइ सेक्ना हुइल ओरसे होम सेन्टरसे करेपरना हुइल बा ।
कक्षा १० के आन्तरिक मूल्यांकनसे नतिजा निकरना तयारी हुइल मने १२ के भर आन्तरिक मूल्यांकनसे नैहुके भौतिक उपस्थितिमे परीक्षा लेहेपरना सुझाव आइलओरसे होम सेन्टरसे परीक्षा लेहे लागल सदस्य सचिव अर्याल जानकारी डेलैं ।
उहाँक अनुसार कक्षा १२ के २८ से कम विद्यार्थी हुइल एक हजार विद्यालय बा, ५० से कम विद्यार्थी हुइल दुई हजार ३००, एक सयसे कम विद्यार्थी हुइल तीन हजार ४०० ओ ५०० से ढेर विद्यार्थी हुइल विद्यालय ८९ ठो बा ।
कक्षा १२ के परीक्षा सावन ३१ गतेसे भदौ ९ गतेसम सञ्चालन हुइटा ।
बैठकमे सांसद खगराज अधिकारी होम सेन्टरसे परीक्षा लेलेसे उहैंक निरीक्षक नैहुए परना व्यवस्था करना सुझाव डेलैं । “नैटे चोरके पास करैना फेन हुइ सेकि,” अधिकारी कलैं ।
सांसद मानबहादुर विश्वकर्मा विद्यार्थीसे उच्च शिक्षा पह्रे नैसेक्ना करके कौनो कार्य कहुसे नैहुइक परना बटैलैं ।
सांसद मनकुमारी जिसी परीक्षा संचालन करेबेर स्वास्थ सुरक्षा मापदण्ड कडाइके साथ कार्यान्वयन करेपरना बटैलि ।
सांसद गिरिराजमणि पोखरेल शिक्षक ओ विध्यार्थीहे कोरोना खोप नैडेहटसम भौतिक उपस्थित सुरक्षित हुइ नैसेक्ना बटैलैं ।
साथे उहाँ नेपाल कोरोनाके बाबजुद शैक्षिक सत्र बचाइल बटैलैं । ओ, आब आन्तरिक मूल्यांकनमे स्कुलसे जथाभावी नैकरे कहिके स्थानीय सरकारहे अवलोकनके जिम्मेवारी वा अधिकार डेहेपरना फेन बटैलैं ।
सांसदहुकनके प्रश्नके जवाफ डेटि शिक्षा मन्त्रालयके सचिव रामकृष्ण थपलिया सिसिएमसीसीके निर्णय अनुसार परीक्षा संचालन करे लागल बटैलैं ।
सीसीएमसीसीसे स्वास्थ सुरक्षा मापदण्ड अपनैना कहल ओरसे ओहे अनुसार व्यवस्थापन करना परीक्षा केन्द्रहहे कहल ओ अभिन कना उहाँ बटैले बटैं ।
