२० लाख रुप्याके घाँस विक्री

घाँस खेतीमे दोहोरो फाइदा, एकओर घाँस विक्री डोसरओर पशुपालनमे सहयोग

पहुरा समाचारदाता
धनगढी, २४ भदौ । कैलाली जिल्लाके कैलारी गाउँपालिका–५, पवेरामे व्यावसायिक रुपमे घाँस खेती करटी रहल बन्डोली एकीकृत कृषि फर्म यी बरस २० लाख रुप्यक घाँस विक्री कैले बा ।

‘व्यावसायिक रुपमे ६ विघामे लगाइकल घाँस यी बरस करिब २० लाख रुप्याके विक्री कैगिल बा,’ फर्मके व्यवस्थापक शंकरसिंह विष्ट कहलै– ‘खर्च कटाके हेरेबेर १५ लाख रुप्या बराबर आम्दानी हुइल बा ।’

व्यावसायिक रुपमे लागके कुछ करे परल कहटी विष्ट तराई झरल रहिट, महोल विथोललपाछे वैदेशिक रोजगारके लाग उहाँ दुवई पुगल रहिट । विदेशमे पुगेबेर सोचल जस्टे काम नइहुइलपाछे २/३ महिना भ्रमण करके अपने गाउँठाउँमे कुछ करे परल कहटी लौटके २०७५ साल भदौसे व्यावसायिक घाँस खेती सुरुवात करल उहाँ कहलै ।

‘मेनपावर कम्पनीमार्फत वैदेशिक रोजगारके लाग विदेश गैनु,’ उहाँ कहलै, ‘कन्टेक्ट कम्पनीमे पठाडेहल, यहोर सम्झौता एक मेरिक उहोर काम दुसर लगाइलपाछे खासे मजा काम नइडेखके यिहीसेटे स्वदेशमे काम कैना मजा हो कहटी लौटगिनु ।’

सुदूरपश्चिम प्रदेशके दार्चुला जिल्ला साविक सारमुली गाविस हालके लेकम गाउँपालिका वडा नम्बर १ सारमली स्थायी घर रहल शंकरसिंह विष्ट बन्डोली एकीकृत कृषि फर्म दर्ता करके कैलालीके कैलारी गाउँपालिका वडा नम्बर ५ पवेरामे सात विघामे व्यावसायिक घाँस खेती सुरु करल रहिट ।

‘पहिले कृषि ओर काम कैना कहिके व्यावसायिक ओर लागल रहु,’ शंकरसिंह कहलै– ‘टिना खेतीसंगे दार्चुलाके गोकुलेश्वरमे दुई बरस होटल चलागिल, बारीमे लगाइल टिना बेचके नइहुइलपाछे व्यावसायीमुखी कृषि अर्थतन्त्रहे परम्परागत ढंगसे चलैना सोचके साथ तराई आके घाँस खेती सुरुवाट कैनु ।’

चितवानसे सुपरनेपियर जात घाँसके विया खरिदके पाँच कटठामे सुरुवाट करल घाँस खेतीके विस्तार करटी १ विघा पाँच कटठा पुगैनु उहाँ बटैलै । उहाँ कहलै, ‘अब्बे ६ विघामे सुपरनेपियर, सुम्बा सेटेरिया, पासपालम, किम्बु, भटमासे, गोदामे, जै, बरसीन, बाह्रै महिना, हिउँदे, वर्षिय, बहुवर्षिय लगायत ढेर घाँसके बेर्ना ओ विउ उत्पादन हुइटा, जेम्नेसे उत्पादन हुइल विया सुदूरपश्चिम प्रदेशके नौ जिल्लामे विक्री वितरण हुइटी बा ।’

बन्डोली एकीकृत कृषि फर्मसे कैलारी गाउँपालिका वडा नम्बर ५ मे १०/१० बरसके लाग दुई ठाउँमे साढे तीन लाखके लिजमे लेहल जग्गामे पशुपालनसंगे हिउँदे, वर्षिय, बहुवर्षिय, दाले घाँस लगायत सक्कु घाँसके टमान जातके विया उत्पादन करटी विउ विक्री वितरण करटी रहल बा ।

‘घाँस खेतीमे सोचलसे मजा आम्दानी हुइल बा,’ फर्मके प्रोपराइटर सुशीला विष्ट कहली, ‘यी बरस २० लाख रुप्या बराबरके घाँस विक्री कैगिल, खर्च कटाके १५ लाख रुप्या बचत हुइल बा ।’ फर्मके प्रोपराइटर सुशीला कहली, ‘६ विघामे लगाइल घाँस खेतीमे दोहरो फाइदा बा, विउ ओ डठ विक्रीसे मजा आम्दानी बा, कलेसे ओकर पटिया ओ पोँकीसे पशुपालनमे सहयोग पुगटा ।’

‘व्यावसायिक रुपमे गैया, भैसिनीय, छेगरी, मुरगी, मच्छी पालन करुइया व्यवसायिक फर्महे घाँस विक्री कैजैटी रहल उहाँ बटैली । हमार फर्मसे उत्पादन कैगिल घाँस प्रदेशभरके स्थानीय पालिका ओ व्यक्तिगत फर्ममे विक्री हुइटी रहल बा,’ प्रोपराइटर विष्ट कहली, ‘हमार फर्मसे सुपरनेपियर, सुम्बा सेटेरिया, पासपालम, किम्बु, भतमासे, गोदामे, बाह्रै महिना, हिउँदे वर्षिय, बहुवर्षे लगायत टमान जातके घाँसके बेर्ना ओ विउ उत्पादन कैजाइटा ।’

फर्मसे व्यावसायिक रुपमे भैंसिनिया ओ गैयापालन करटिरहल बा ।