छाडाचौपायासे धानबाली जोगैना रातभर जाग्राम

टिआर कठरिया
पहलमानपुर, २१ कुँवार । कैलालीके घोडाघोडी नगरपालिका वडा नम्बर १०, ११ पहलमानपुर क्षेत्रके वासी छाडा पशुचौपायाके कारण समस्यामे परल बटैं । यी क्षेत्रमे छाडा पशुचौपायाके कारण सडकमे नेंगघुम करना, यातायात ओहोरदोहोर करना समस्याके साथे धानबाली जोगैना फेन कर्रा हुइल बा ।

पहलमानपुर बजारमे व्यापार करटि रहल नविनकिशोर आचार्य बजारमे दैनिक जैसिन सयौंके संख्यामे पशुचौपाया रहल ओरसे दुर्घटनाके जोखिम बह्रल बटैलैं । बजार क्षेत्रमे छाडा चौपायाके कारण दैनिक रुपमे छोटभारी दुर्घटना हुइटिरहल उहाँ बटैलैं ।

ओस्टेक, बजारके छाडा पशुचौपायाके मलमुत्रसे बजार दुर्गन्धित हुइल औरे व्यापारी आकाश चौधरी बटैलैं । बजार दुर्गन्धित होके बजारबासीहुकनके स्वास्थ्यमे समेत प्रतिकुल असर परल उहाँ बटैलैं । उहाँ समयमे छाडा पशुचौपायाके उचित व्यावस्थापन करेपरना बटैलैं ।

पशुचौपायाके कारण व्यापार व्यावसायमे समेत असर परल व्यापरी जीतेन्द्र चौधरी बटैलैं । उहाँ कलैं, ‘पसलके आघे चौपाया भरल रठैं । ग्राहक परलमे कहाँसे अइहि अइलेसे हतारहतार किनबेच करेपरठ ।’ ‘पसलमे ढरल टिना खाडेना, डाबडेना, बाहेर ढरल सामान फोहोर करडेना, मनैन्हे मारे अइना, डरवैना हुइल ओरसे व्यापारमे समस्या परल बा ।

स्कुले बालबालिका समस्यामे

ओस्टेक, ज्ञानज्योति माध्यमिक विद्यालयके प्रध्यानाध्यापक रघुनाथ चौधरी छाडा पशुचौपायाके कारण स्कूले विद्यार्थीनहे फेन समस्या हुइल बटैलैं । ‘लम्मा समय कोरोना महामारीके कारणसे भौतिक रुपमे विद्यार्थीहुकनहे उपस्थित कराके पठनपाठन सम्भव हुइ नैसेकल । हाल आके ढिरेसे हुइलेसे फेन विद्यालय खुलटा,’ उहाँ कलैं, ‘बलटल खुलल स्कुल जैना डगरभर छाडा चौपाया डेख्के स्कूले बालबालिका डरा–डरा स्कुल अइठैं ।’ उहाँ समस्या समाधानके लाग सम्बन्धित सरोकारवाला निकायहे पहल करना करना आग्रह करलैं ।

धानबाली जोगैना रातभर जाग्राम

छाडा पशुचौपायाके कारण पहलमानपुर क्षेत्रमे धानबाली जोगैना फेन समस्या हुइल बा । छाडा चौपाया खेटुवामे जाके धानबाली खैना, गिज्ला डेहल कारण यी क्षेत्रके कृषक चिन्तित हुइल बटैं ।

छाडा पशुचौपायासे धानबाली बचाइक लाग रातभर कृषकहुक्रे जाग्राम बैठेपरना घोडाघोडी–११ के कृषक जिरु कठरिया बटैलैं । चौपाया दिनमे से रातके समयमे ढेर नोक्सानी करना हुइल ओरसे रातके धान रखाइपरल उहाँ बटैलैं । उहाँ कलैं, ‘का करना हो हम्रे टे कृषक परलि खेती नैकरके सुखे नैहो, करि कलेसे छोरवा गाईगोरुे बचे नैडेना हुइल बा ।’

नियन्त्रणमे चुनौती

छाडा चौपाया नियन्त्रण पहलमानपुरके किल नैहुके देशके समस्याके रुपमे रहल ओरसे यकर दीर्घकालीन समाधानके उपाय तत्काल खोज्न चुनौती रहल स्थानीय निकायके कहाइ बा । पहलमानपुर क्षेत्रके छाडा चौपायाहे पूर्णरुपमे हटाइ नैसेक्लेसे फेन न्यूनीकरणके लाग औरेओर सरना प्रयास करना घोडाघोडी नगरपालिका वडा नम्बर १० के वडाध्यक्ष भीमबहादुर बम बटैलैं । उहाँ यी विषयमे नगर सरकारहे आग्रह करटिरहल बटैलैं ।