बाढसे प्रभावितके व्यवस्थापन कैना आग्रह
पहुरा समाचारदाता
धनगढी, ३ कार्तिक । गैर सरकारी संस्था महासंघ नेपाल सुदूरपश्चिम समिति बाढसे प्रभावितहुकनके तत्काल व्यवस्थापन कैना आग्रह करले बा ।
महासंघसे आज प्रेस विज्ञप्ती जारी करटी स्थानीय सरकार, प्रदेश सरकार ओ संघीय सरकारहे तत्काल किसानके क्षतिके यथार्थ मुल्यांकन करके उचित क्षतिपुर्ति, यथासिघ्र राहातके प्याकेज व्यवस्था कैना, पूर्वतयारी तथा प्रतिकार्य योजनाके व्यवस्थित कार्यान्वयन करके जोखिममे परलहुकनके तत्काल उद्धार ओ सुरक्षित स्थानमे बसोवासके व्यवस्था करके थप जनधनके क्षति हुई नइडेहक लाग पहल कैना ओ मृतकके परिवारहे उचित सहयोग ओ घाहिलहुकनके निःशुल्क औषधि उपचारके व्यवस्था कैना आग्रह करल हो ।
नेपालसे यी वर्षके मनसुन बाहिरल लगत्ते हाल बंगालके खाडीमे ओ उत्तरओर सरटी रहल मध्यभारतमे रहल न्यूनचापीय प्रणाली ओ पश्चिमी वायु प्रणालीके संयुक्त प्रभाव नेपालमे परके यिहे कुवाँर ३१ गतेसे कार्तिक २ गतेसम भारी बर्खा हुके सुदूरपश्चिम प्रदेश नइमजासे प्रभावित हुइल अवस्था बा ।
“अविरल बर्षाके कारण सुदुरपश्चिममे भारी जनधनके क्षति हुइल बा,” विज्ञप्तीमे कहल बा, “ यी दुखद घडिमे वाढ ओ पहिरोमे परके ज्यान गुमुइयाप्रति हार्दिक श्रद्धान्जली अर्पण करटी । घाहिलके सिघ्र स्वास्थ्यलाभके कामना सहित वेपत्ताहुकनके कुशलताके कामना करटी । अपन ज्यानके प्रवाह नइकरके उद्धारमे खटल सुरक्षाकर्मी, सरकारी तथा गैर सरकारी निकायके सक्कु प्रतिनिधिहुकनहे हार्दिक धन्यवाद डेहे चाहटी ।”
धानबाली भित्रैना बेलामे लगातारके तीन दिनके वर्षासे धानवाली नष्ट हुइना किसानके मिहिनेत उप्परके बज्रपात हो ओ देशके लाग भारी चुनौतीफे हो । मुख्य खाध्य बालीके नोक्सानीसे यी वर्ष खाद्य संकट अइना सम्भावना रहल विज्ञप्तीमे कह बा ।
यी बिषम परिस्थितिमे गैर सरकारी संस्था महासंघ नेपालके सदस्य संस्था, सुदूरपश्चिम प्रदेशमे काम करटी रहल सक्कु राष्ट्रिय तथा अन्तराष्ट्रिय गैरसरकारी संस्था, साझेदार निकायलगाएत सक्कुहुनहे सम्बन्धित निकायसंगके समन्वयमे राहत सामग्री वितरण, जनचेतना लगाएत आवश्यक और सहयोग कैना ओ अपनसंग रहल मानवश्रोतहे स्वयमसेवी हुके उद्धार कार्यमे लगैना अनुरोध करले बा ।
