२० लाखके तटबन्ध अक्के बाढमे पुहल
शिवरत्नापुरबस्ती परल उच्च जोखिममे
पहुरा समाचारदाता
धनगढी, २४ असार । कैलाली जिल्लाके कैलारी गाउँपालिका वडा नम्बर ३ शिवरत्नापुर गाउँ जोगाइक लाग मोहना लडियामे बनागिल २० लाखके तटबन्ध अक्के बाढमे पुहल बा ।
बस्तीहे जोगाइक लाग गाउँपालिकाके आर्थिक सहयोगमे १५ लाखके भौतिक तटबन्धके काम ओ विपद जोखिम न्यूनिकरण अन्र्तगत ५ लाखमे जैविक तटबन्धके काम सम्पन्न हुइल रहे ।
मोहना लडियक धार सोझे वस्ती टकाइल ओरसे भौतिक तटबन्धके काम बैशाख ६/७ गतेसे सुरुवाट कैके गैल जेठ १५ गते सम्पन्न हुइल रहे । ओस्टेके शिवरत्नापुरबासीहुक्रे भौतिक तटबन्धहे जोगाइक लाग जैविक तटबन्धफे निर्माण करल तटबन्ध निर्माण उपभोक्ता समितिके अध्यक्ष सन्तराम चौधरी बटैलै । उहाँ कहलै, भौतिक तटबन्धके काम जेठ १५ गते सम्पन्न हुइल रहे । भौतिक तटबन्धहे जोगाइक लाग जैविक तटबन्धके कामफे कैले रही ।’
बरा मेहनत करके बनागिल भौतिक ओ जैविक तटबन्ध असार महिनाके अक्के बाढमे पुहल बा,’ उपभोक्त समितिके अध्उक्ष सन्तराम कहलै, ‘गैल बरसके कुवाँर–कार्तिकमे आइल बेमौसमी बाढसे मोहना लडियक धार गाउँ टकासेकल रहे । भौतिक तटबन्धसे केल पानीके बहाव सेक्ना सम्भव नइरहल ओरसे भौतिक तटबन्धफे बानगिल रहे । मने दुनुक दुनु बाढसे पुहलपाछे बस्ती उच्च जोखिममे बा ।’
गैल बरस कुवाँर–कार्तिकमे आइल बेमौसमी बाढसे काटके धारल सारा गाउँक धान पुहैनाके साथे खेती योग्य जमिन बलुटियामे परिणत करल शिवरत्नापुरके स्थानीय धानफे नइलगाइल समितिके अध्यक्ष चौधरी कहलै ।
शिवरत्नापुर गाउँमे गैल बरसके बेमौसमी बाढसे करिब ९५ घरधुरीके धान पुहाके लैगिल खेती योग्य जमिनमे बालु भर डेहल उहाँ बटैलै । बर्षेणी बर्खाके बेला कटान करटी मोहना लडिया सयौं विघा खेती योग्य काटके लैगिल उहाँ बटैलै ।
शिवरत्नापुर गाउँके स्थानीय कमल चौधरी बस्ती जोगाइक लाग भौतिक ओ जैविक तटबन्ध बनाइल मने असारके बाढसे पुहाके लैगिलपाछे तटबन्धके नामो निशान नइरहल बटैलै । बाढ अइटीकी सुरुमे १५ घरधुरीके उठिबास हुइना अवस्था बा,’ उहाँ कहलै, ‘लडियक धार सोझे गाउँ ताकल कारण १५ घरधुरीसंगे भारी बाढ अइलेसे यी बस्तीके ९५ घरफे उच्च जोखिममे बा । भग्नाफे समस्या रहल बा ।’ गाउँभरिक मनै बैठक करके भल्मन्सा मार्फत गाउँसभा परिषदमे निवेदन डेहे लडियक धार डोजरसे परिवर्तन कहले बटी, उहाँ कहलै । हम्रे अपन उपाय अपनैली गाउँपालिकाके अपन उपाय हुई कलेसे बस्ती जोगा डेहे परल कहले बटी ।
उ बस्तीके दुसर स्थानीय सुदेशु चौधरी बस्ती जोगाइक लाग लडियासे ३० मिटर दुरीमे चरुवा उठाइल मने अब्बे लडिया करके एक मिटर केल बचाइल बटैलै । पुरे बर्खा अभिन परली बा,’ उहाँ कहलै, ’चरुवा भस्कलकी बाढ सिधा गाउँ पैठल । चरुवा हिटकले गाउँबस्ती बा । उ बस्तीके १५ घर बहुत जोखिममे रहल बा ।’ बस्ती जोगाइक लाग ८ ठो छेक (भौतिक तटबन्ध) बनाइल रहे । ६ ठो पुरा लैगिल २ ठो थोरथोर बचल बा, उहो जाई जाई बा ।’
