मुस्लिम समुदायसे पाइल अधिकार सुनिश्चित करे परठः प्रदेश प्रमुख मियाँ
पहुरा समाचारदाता
धनगढी, ९ जेठ । सुदूरपश्चिम प्रदेशके प्रदेश प्रमुख नजिर मियाँ मुस्लिम समुदायसे पाइल अधिकार सुनिश्चित करे पर्ना अवस्था रहल बटैले बटै ।
मुस्लिम आयोगसे धनगढीमे आयोजना करल कार्यक्रममे प्रदेश प्रमुख मियाँ संविधान मार्फत मुस्लिम समुदायके लाग टमान अधिकार स्थापित हुइल ओ अब कार्यान्वयनके पक्ष बल्गर बनैना आवश्यक रहल बटेले बटै । ‘हम्रे सबसे मजा संविधान बनल बा । उ संविधानसे मुस्लिम समुदायहे टमान अधिकार डेहल बा, ओसिन अधिकार छिमेकी मुलुकमेफे नइहो उहाँ कहलै, ‘अब अधिकार स्थापित करे परठ ।
प्रदेश प्रमुख मियाँ मुस्लिम समुदायके नागरिकहुकनके चेतनाके स्तर बह्रैना आवश्यक रहल टिप्पणी करल रहिट । उहाँ शिक्षा स्वास्थ्य ओ नागरिकतामे समस्या रहल कहटी उ समस्या समाधान कैनाफे अपन भूमिका खेल्न बटैलै ।
मुस्लिम आयोग अध्यक्ष समिम मियाँ अन्सारीफे मुस्लिम समुदायसे अधिकार पाइल मने, पाइल पुरे अधिकार सुनिश्चित कैना अभिन नइसेकल बटैलै । उहाँ सक्कु प्रकारमे सरकारी नियुक्ति ओ सरकारी सुविधाफे उपस्थितिके आधारमे उपलब्ध हुई पर्नामे जोड डेहल रहिट । संघीय निजामती विधेयक पारित हुइलपाछे अभिन सहज हुइना अध्यक्ष अन्सारी विश्वास व्यक्त करलै ।
मुस्लिम समुदायके अभिन फे टमान समस्या झेल्टी रहल कहटी उ समस्या समाधान कैना प्रदेश प्रमुखसेफे भूमिका खेल्नमे उहाँ विश्वास व्यक्त करल रहिट । उहाँ पहिल चो मुस्लिम समुदायसे प्रदेश प्रमुख नियुक्त हुइलप्रति फे उत्साहित हुइपर्ना बटैलै ।
कार्यक्रममे नेपाल मेडिकल एसोसिएसन प्रदेश सचिव डा. मेराज आलम अन्सारीसे सुदूरपश्चिम प्रदेशमेफे मुस्लिम आयोगके सम्पर्क कार्यालय खोल्न आग्रह करलै । शिक्षा स्वास्थ्य ओ रोजगारीके अवसर पैनासे वञ्चित हुइल ओ नागरिकता जन्म दर्ता ओ मृत्यु दर्तासे ढेर समस्या रहल कहटी यी विषयमे चासो डेहे पर्ना उहाँक जोड रहे ।
कैलालीके प्रमुख जिल्ला अधिकारी धर्मेन्द्र मिश्र व्यक्तिगत घटना दर्ताके विषयमे अपने सहजीकरण कैना प्रतिवद्धता जनैलै । उहाँ आरक्षण डेके केल चेतना विकास नइहु्इना कहटी उ समुदायमे सशक्तीकरण अभियान चलैना आवश्यक रहल बटैले रहिट ।
मस्कुर अहमद अपन समस्याके विषयमे प्रस्ट राखे पर्ना कहटी सरकारसे गुणस्तरीय शिक्षाके व्यवस्था करे पर्नामे जोड डेलै । मस्जिद मदर्सा मुस्लिम सेवा समाजके अध्यक्ष मोहम्मद नाइमुद्धिन भाटसे अभिनफे ढेर नागरिकता नइपाइल कहटी उ विषयमे चासो डेना आग्रह करले रहिट । उहाँ सुदूरपश्चिम प्रदेशमेफे लोकसेवा सम्बन्धी कक्षा सञ्चालन कैना आग्रह करलै ।
जिल्ला समन्वय समिति कैलालीके कार्यवाहक प्रमुख खगराज भुसाल मुस्लिम समुदायके नागरिकहुक्रे नागरिकता पाके बहुट समस्या रहल कहटी अपनेफे उ विषयमे सहजीकरण कैना बटैलै । उहाँ मुस्लिम आयोगहे अभिन प्रभावकारी काम कैनाफे सुझाव डेहल रहिट । पहिल चो प्रदेश प्रमुख मुस्लिम समुदायसे हुइल कहटी यिहीसे ढेर जे अपन समुदायसेफे कुछ व्यक्ति यहाँ सम पुगे सेक्ठै कना धारणा बनाई पर्नामे जोड डेहल रहिट ।
मुस्लिम समुदायके आर्थिक सामाजिक सांस्कृतिक लगायतके विविध विषयक शसक्तिकण तथा क्षमता विकास कार्यक्रममे आयोगके अध्यक्ष सहित सक्कु सदस्य उपस्थित रहिट । कार्यक्रम आयोग सदस्य महमदिन अलीसे सञ्चालन करल रहिट कलेसे दुसर सदस्य मिर्जा अरशद बेग धन्यवाद प्रकट करले रहिट ।
ओस्टेक करके प्रदेश प्रमुख कार्यालयमे मुस्लिम आयोगसे प्रदेश प्रमुख नजिर मियाँहे आयोगके प्रतिवेदनफे पेश करले बटै । प्रतिवेदन अध्यक्ष समिम मियाँ अन्सारीसे आयोगहे अभिन बल्गर बनाई पर्ना ओ सक्कु ठाउँमे समावेशिताके सिद्धान्त अनुसार अवसर पाई पर्नामे जोड डेहल रहिट ।
प्रदेश प्रमुख मियाँ प्रतिवेदन बुझ्टी आयोगहे मुस्लिम समुदायसे अधिकार सुनिश्चित कैना करके काम कैना सुझाव डेहल रहिट । प्रतिवेदन पेश करेबेर आयोगमे सक्कु सदस्य, प्रदेश प्रमुखके प्रमुख स्वकीय सचिव साबिर अली ओ प्रदेश प्रमुख कार्यालयके कर्मचारी उपस्थित रहिट ।
