अपाङता हुइल मनैनहे सम्मान व्यवहार करी; गापा उपाध्यक्ष भगवती
पहुरा समाचारदाता
धनगढी, ७ भदौ । अपाङगता हुइल मनैनके अधिकार सम्बन्धमे शुकके रोज कैलारी–१ हसुलियामे अभिमुखीकरण कार्यक्रम सम्पन्न हुइल बा ।
कैलारी गाउँपालिकाके समन्वयमे सामुदायिक विकास केन्द्र (सिडीसि) डोटीके आयोजना ओ यूनिसेफके सहयोग सहकार्यमे गाउँपालिका अध्यक्ष राजसमझ चौधरीके अध्यक्षतामे अभिमुखीकरण कार्यक्रम हुइल हो । अभिमुखीकरण कार्यक्रममे गाउँपालिका उपाध्यक्ष भगवतीकुमारी चौधरी अपाङगता हुइल मनैनहे सम्मान करेपर्ना बटैली । उहाँ कहली, ‘गाउँपालिकासे अपाङता हुइल मनैनहे आर्थिक सशक्तीकरणसे जोरेक लाग टमान मेरिक सीपमुलक आयमुलक कार्यक्रमके आयोजना करके सहभागी कराइल बा ।’
गाउँपालिकासे ग ओ घ बर्गके अपाङगता हुइल मनैफे आर्थिक रुपमे बल्गर हुइट कहटी बेतबाँससे मुढा बनैना तालिम डेहल बटैली । ग ओ घ वर्ग भिटर पर्ना अपाङता व्यक्ति सामाजिक सुरक्षा भत्ता नैपैलेसे और सेवा सुविधा पैना उहाँ बटैली ।
अपाङता हुइल मनैनहे बोल्ना भाषासे कैना व्यवहार सम्मानजनक हुइपर्ना उहाँ बटैली । गाउँपालिकासे लौव बन्ना भौतिक संरचना अपाङगतामैत्री, बालमैत्री बनैटी रहल बटैली ।
कार्यक्रममे प्रकाश आचार्य अपाङता रहल मनैनहे कैजिना वर्गिकरण ओ ओइने पैना सेवा सुविधाबारे प्रस्तुतीकरण करल रहिट । सरकारसे अब्बे चार मेरिक अपाङता वर्गिकरण करल जनैटी क ओ ख वर्गहे सामाजिक सुरक्षा भत्ताके व्यवस्था करल जनैलै । ओस्टेक करके उहाँ १० मेरिक अपाङताके प्रकारबारे जानकारी डेहल रहिट ।
जेम्ने शारीरिक अपाङताः स्नायु, मासंपेशी ओ जोर्नी तथा हडडीके बनावट एवं सञ्चालनमे समस्या हुइल कारणसे कौनो व्यक्तिके अङके सञ्चालन, प्रयोग ओ नेंगघुममे समस्या (जस्टेः बाल पक्षघात (पोलियो), शारीरिक अङविहीन, कुष्ठ प्रभाव, मांसपेशी विचलन (मस्कुलर डिस्ट्रोफी), जोर्नी ओ मेरूदण्ड सम्बन्धी स्थायी समस्या, क्लवफीट पौला घुमल, रिकेट्स हडडी सम्बन्धी समस्याके कारण उत्पन्न अशक्तता) तथा सोह्र वर्ष उमेर पुगल व्यक्तिमे उमेर बमोजिम हुई पर्ना औसत उचाइसे बहुट कम उचाइ हुइल व्यक्ति रहल जनैलै ।
दृष्टि सम्बन्धी अपाङताः कौनो व्यक्तिमे कौनोफे वस्तुके आकृति, आकार, रूप ओ रङके ज्ञान नइना हो । ओम्नेफे दृष्टि विहीनता, न्यून दृष्टियुक्त, पूर्ण दृष्टिविहीन रहल बटै ।
सुनाइ सम्बन्धी अपाङताः सुनाइके अङके बनावट एवं स्वरके पहिचान, स्थान, उतारचढाव तथा स्वरके मात्रा ओ गुण छुट्यइ नैसेक्ना व्यक्तिहे जनाजाइठ । ओम्ने बहिरा, सुस्तश्रवण रहल व्यक्ति परठै ।
श्रवण दृष्टिविहीन अपाङताः सुनाइ सम्बन्धी ओ ओ दृष्टिसम्बन्धी दुनु अपाङता हुइल वा दुनु इन्द्रिय सम्बन्धी अपाङताके संयुक्त अन्तरक्रिया रहल व्यक्ति परठै ।
स्वर ओ बोलाइ सम्बन्धी अपाङताः स्वर ओ बोलाइ सम्बन्धी अङममे उत्पन्न कार्यगत सीमितताके कारण तथा बोलेबेर स्वरके उतार चढावमे कठिनाइ, बोली स्पष्ट नैहुइना, बोलेबेर शब्द वा अक्षर दोहरैना व्यक्ति परठै ।
मानसिक वा मनोसामाजिक अपाङताः मस्तिष्क ओ मानसिक अङमे आइल समस्या तथा सचेतना, अभिमुखीकरण, स्फूर्ति, स्मरणशक्ति, भाषा, गणनाजैसिन बौद्धिक काम करैना सन्दर्भमे अइना समस्याके कारणले उमेर ओ परिस्थिति अनुसार व्यवहार कैना समस्या हुइना अवस्थाके व्यक्ति परठै ।
बौद्धिक अपाङताः उमेरके बृद्धिसँगे बौद्धिक सचेतनाके विकास हुई नैसेक्के बौद्धिक विकास नैहुइल कारणसे उमेर वा वातावरणमे सापेक्ष क्रियाकलाप कैना समस्या हुइना अवस्थाके व्यक्ति । (जस्टेः डाउन्स सिन्ड्रोम समेत) परठै ।
अनुवंशीय रक्तश्राव (हेमोफिलिया) सम्बन्धी अपाङताः अनुवंशीय असरके कारण रगतमे हुइना फयाक्टरमे विचलन आके रगत जम्न कार्यमे समस्या उत्पन्न हुइना शारीरिक अवस्थाके व्यक्ति परठै ।
अटिज्म सम्बन्धी अपाङताः जन्मजात नशा वा तन्तुके विकास ओ ओकर कार्यमे आइल समस्या हुइल व्यक्ति परठै । (जस्टेः सञ्चार कैना, सामान्य सामाजिक नियम बुझ्न ओ प्रयोग कैना कठिनाई हुइना तथा उमेरके विकाससँगे सामान्य व्यवहार नैडेखैना, अस्वभाविक प्रतिक्रिया डेखैना, एक्के क्रिया लगातार दोहरैना, औरसंग घुलमिल नैहुइना वा तीव्र प्रतिक्रिया कैना व्यक्ति परठै ।
ओस्टेक करके बहुअपाङताः एक्के व्यक्ति उप्पर दुई वा दुईसे ढेर मेरिक अपाङगताके समस्या रहल व्यक्ति । (जस्टेः मस्तिष्क पक्षघात आदि) परठै ।
कार्यक्रममे सिडीसि डोटीके कार्यक्रम संयोजक तिलक चौधरीफे सहजीकरण करल रहिट । अभिमुखीकरणमे गाउँपालिकाके निमित्त प्रमुख प्रशासकीय अधिकृत सुर्य प्रसाद चौधरी, वडा अध्यक्षहुक्रे,कार्यपालिका सदस्य, सिडीसिके डोटीके कार्यक्रम अधिकृत करुणा चौधरी, महिला तथा बालबालिका शाखा प्रमुख, स्वास्थ्य शाखा लगायत अपाङता संजालके प्रतिनिधिहुकनके सहभागिता रहे । कार्यक्रमके संचालन गाउँपालिकाके सामाजिक विकास शाखा प्रमुख यगम कलेल करल रहिट ।
