संघसंस्था दर्ता ऐनके मस्यौदाबारे छलफल
पहुरा समाचारदाता
धनगढी, १६ भदौ । गैरसरकारी संस्था महासंघ नेपाल जिल्ला शाखा कैलालीके आयोजनामे सोम्मारके रोज धनगढीमे संघसंस्था दर्ता ऐन २०८२ के मस्यौदामे छलफल तथा सुझावके लाग सरोकारवाला निकायसँग अन्तरक्रिया कार्यक्रम हुइल बा ।
कार्यक्रममे संघसंस्था दर्ता ऐन २०८२ के मस्यौदाउप्पर तीन महले सुझावउप्पर सहजीकारण तथा छलफल हुइल रहे । कार्यक्रममे गैरसरकारी संस्था महासंघ नेपाल सुदूरपश्चिम प्रदेश समिति अध्यक्ष देवीप्रसाद खनाल सहजीकरण करले रहैं ।
गैरसरकारी संस्था महासंघ नेपाल जिल्ला शाखा कैलालीके अध्यक्ष चेतमान साउँदके अध्यक्षतामे हुइल कार्यक्रममे जिल्ला वार एशोसिएशन कैलालीके उपाध्यक्ष हिमालयविक्रम विष्ट, गैसस महासंघ प्रदेश पूर्व उपाध्यक्ष बलबहादुरा रोकाया, गैसस महासंघ जिल्ला शाखा कैलालीके पूर्व अध्यक्ष हेमकर्ण विक, राष्ट्रिय अपांग महासंघलगायतके टमान गैरसरकारी संस्थाके सहभागिता रहल रहे ।
कार्यक्रमके सञ्चालन गैसस महासंघ सुदूरपश्चिम प्रदेश कर्मचारी गोकुलबहादुर खड्का करले रहैं ।
